Estonski pasoł padčas adkryćcia vizavaha centra ŭ Minsku paraŭnaŭ svaju krainu z sunicami
U paniadziełak pasoł Estonii Majci Marcinsan pierarezaŭ čyrvonuju stužku ŭ chole infarmacyjna-vizavaha centra estonskaha pasolstva ŭ Minsku i patłumačyŭ biełarusam, navošta im treba jechać u hetuju maleńkuju krainu.
«Estonija jak sunicy: ty možaš doŭha ich nie zaŭvažać, a kali znojdzieš, pakaštuješ — bolš nie zabudziešsia i zachočaš jašče», — raspavioŭ Marcinsan.
Vizavy centr Estonii ŭ Minsku zapracavaŭ jašče ŭ lutym, na pieršym paviersie biźnies-centra SV Plaza pa vulicy Čyhunačnaj, 33 — niedaloka ad stancyi mietro «Michałova». Takija centry ŭ pačatku 2016 hoda adkryli jašče ŭ troch haradach Biełarusi: Hrodnie, Homieli i Breście.
A navošta, naprykład, hamialčanam marnavać čas, jechać u Minsk, kab padać dakumienty? Lepš zrabić usio ŭ svaim horadzie», — patłumačyŭ pasoł.
Dla zajaŭnikaŭ ŭ estonskim vizavym centry dastupnyja pasłuhi atrymańnia strachoŭki, fatahrafii i kapiravańnia dakumientaŭ. Termin razhladu zajaŭ — ad 5 dzion da miesiaca.
Navošta biełarusam jechać u Estoniju
«U ciapierašnija časy nie ŭsich ciahnie jechać, dakładniej, lacieć tudy, dzie niezrazumieła što adbyvajecca. U Estoniju ža možna pryjechać na mašynie — usiaho 2—3 hadziny jazdy. U nas vielmi šmat zasielenych vyspaŭ, ni Litva, ni Łatvija, naprykład, nie mohuć pachvalicca tym ža. Akramia taho, mnohim padabajecca blizkaść Estonii ź Finlandyjaj: možna ŭziać parom, źjeździć na dzianiok u Talin, abo skatacca ŭ Chielsinki — varyjantaŭ šmat. Taksama možna zajechać u Piarnu. U hetym horadzie vydatnyja plažy, hateli — usio, dla dobraha letniaha adpačynku. Pryjazdžajcie ŭ Estoniju albo z maja pa vierasień, albo na Kalady — nie paškadujecie», - raspavioŭ charyzmatyčny Majci Marcinsan.
Estonija — sapraŭdy vielmi maleńkaja kraina. Jaje nasielnictva składaje ŭsiaho 1,3 młn čałaviek. Dla paraŭnańnia: tolki ŭ Minsku pražyvaje 1, 9 miljona čałaviek. Zatoje ŭ hetaj krainie praktyčna niama pramysłovaści, i jość utulnyja chatnija restarančyki, dzie ŭsie stravy pryhatavanyja vyklučna z vyraščanych haspadarami ŭstanovy praduktaŭ. Akramia soli i piercu, naturalna.