U Nahornym Karabachu abvieščana pieramirje
Minabarony niepryznanaj Nahorna-Karabachskaj respubliki zajaviła ab dasiahnieńni pahadnieńnia ab spynieńni ahniu. Baku hetuju infarmacyju paćvierdziŭ.
AP
Armija abarony Nahornaha Karabacha atrymała zahad spynić ahoń, piša rasijski partał RBK. Pra heta paviedamiŭ pres-sakratar ministerstva abarony niepryznanaj Nahorna-Karabachskaj respubliki (NKR) Sienor Asracian.
Infarmacyju pra toje, što vojska Karabacha atrymała zahad spynić ahoń, aficyjny pradstaŭnik vajskovaha viedamstva NKR paćvierdziŭ ahienctvu Reuters.
Pa słovach Asraciana, armianski i azierbajdžanski baki kanfliktu ŭ aŭtorak dasiahnuli pahadnieńnia ab spynieńni ahniu. Karabachskija vajskoŭcy atrymali «zahad palityčnaha kiraŭnictva» spynić ahoń u 12:00 pa miascovym časie (11.00 pa Minsku). Jon zapeŭniŭ, što hety zahad vykonvajecca.
Asracian udakładniŭ, što zahad byŭ vypuščany paśla dasiahnieńnia pahadnieńnia ab spynieńni ahniu. «Pahadnieńnie ab spynieńni ahniu dasiahnuta siońnia a 12:00 (11:00), bo adbyvajecca pieramoŭny praces», — cytuje Asraciana «Interfaks».
Jak paviedamlaje azierbajdžanski sajt trend.az, z 12:00 5 krasavika pa pahadnieńni bakoŭ apieracyi na linii sudakranańnia armianskich i azierbajdžanskich vojskaŭ spynienyja, havorycca ŭ paviedamleńni ministerstva abarony Azierbajdžana.
Uzbrojenyja siły Azierbajdžana ažyćciaŭlajuć raboty pa ŭmacavańni na vyzvalenych terytoryjach, adznačajecca ŭ pres-relizie.
Jak možna mierkavać, azierbajdžancam udałosia zachapić vosiem uzhorkaŭ na linii sudakranańnia. Kolkaść zabitych z abodvuch bakoŭ vymiarajecca dziasiatkami, jašče bolš paranienych. Kolkaść achviar siarod mirnaha nasielnictva minimalnaja, bo bai išli ŭ adsielenaj pryfrantavoj zonie.