Niepachisny Kemieran zachistaŭsia pad udaram «Panamy»
Piša Aleś Hierasimienka.
Hety tydzień akazaŭsia vyklučna drenny nie tolki dla Parašenki, jaki prajhraŭ refierendum u Hałandyi i trapiŭ pad žorstkuju ataku ŭ suviazi sa svaimi afšornymi kampanijami, nie tolki dla isłandskaha premjera, imia jakoha vymavić mała ŭ kaho atrymlivajecca i jaki ŭžo ŭvohule nie premjer. Nie tolki dla kitajskich tavaryšaŭ, što tak napužalisia infy pra svaje panamskija rachunki, što pačali rabić niečuvanaje — błakavać anhłamoŭnyja navinnyja sajty kštałtu CNN ci Guardian (svaje sacsietki jany pačyścili ŭžo ŭ paniadziełak). Nie tolki dla prezidenta Arhienciny, suprać jakoha hienprakuror užo raspačaŭ spravu.
Brytanski premjer Kemieran, zdavałasia b, niepachisny i supierpaśpiachovy — pad samym surjoznym udaram za časy svajho premjerstva. U styli Parašenki jak vuž na patelni jon try dni ŭchilaŭsia ad adkazu pra svaju suviaź z «panamskimi» hrošami svajho baćki. I voś narešcie jon zrabiŭ toje, na što Parašenka tak i nie navažyŭsia — intervju sam-nasam na temu afšornych hrošaj.
Vyśvietliłasia, hrošy byli, i nie tolki baćkoŭskija. Ad baćkoŭskich jon, darečy, taksama niamała atrymaŭ, što ŭ tym liku imavierna dazvalaje brytanskamu premjeru mieć niekalkich damoŭ, u tym liku ŭ samym darahim rajonie Łondana.
Ciapier u Brytanii — i tut bačnaje mocnaje adroźnieńnie ad Ukrainy — paŭstajuć pytańni nie stolki pra lehalnaść prybytkaŭ Kemierana, i navat nie pra jahonyja sproby abaranić tyja samyja afšory, kali jašče nichto nie viedaŭ pra toje, što hrošy jaho siamji lažać tam. Hałoŭnaje pytańnie, jakoje zadajuć brytancy, tyčycca sutnaści ludziej, nievialikaha koła, jakoje kiruje ŭ krainie. Koła, jakoje moža dazvolić sabie žyćcio vyšejšaje za mnohija standarty. Žyćcio, srodki na jakoje prychodziać z sakretnych rachunkaŭ, pa jakich padatki možna, u adroźnieńnie ad usich astatnich, nie płacić.
Ciapier usio macniejšyja zakliki da adstaŭki Kemierana hučać u Brytanii. Sydzie jon ci nie, nie viadoma. Ale ciapier zrazumieła adno - žurnalisckija rasśledavańni #panamapapers źmianiajuć sutnaść palityčnaha pracesu va ŭsim śviecie.