«Ščaście — nie vynik pośpiechu. Ščaście — viedać svaju metu» — u Minsku vystupiŭ Nik Vujčyč FOTY
+najlepšyja cytaty
Suśvietna viadomy matyvatar Nik Vujčyč na svaim pieršym vystupie ŭ Minsku vitaŭ sotni ludziej, što pryjšli pasłuchać jaho ščaślivuju historyju. Heta paradaksalna, ale mienavita Vujčyč — čałaviek, što naradziŭsia biez ruk i noh — vučyć ludziej pa ŭsim śviecie być ščaślivymi.
Jon nie vydatkavaŭ nivodnaha dalara na rekłamu i markietynh. Naviedaŭ 58 krain, razmaŭlaŭ z 13 prezidentami, vystupaŭ bolš jak 3 tysiačy razoŭ. Pa televizary jaho bačyli 1,4 miljarda čałaviek, a na staroncy ŭ Fejsbuku 8 miljonaŭ padpisčykaŭ. Urady mianiali zakanadaŭstva krain paśla jaho vizitaŭ, źviartajučy ŭvahu da prablem invalidaŭ. Nik Vujčyč atrymlivaje kala sotni zaprašeńniaŭ na tydzień, i hetym razam siarod inšych jon abraŭ Minsk.
Vujčyč pryjechaŭ u Biełaruś na adzin dzień i adrazu skazaŭ, što choča viarnucca. Z nastupnaha hoda kolkaść padarožžaŭ hetaha dzivosnaha čałavieka budzie skaračacca; heta źviazana z tym, što Nik choča bolš času pravodzić sa svajoj siamjoj, dzie dvoje maleńkich dziaciej. Płanujecca, što značnaja častka pracy budzie ździajśniacca praź internet — arhanizatary prajektu rychtujuć videaroliki, kino i adukacyjnyja prahramy. Ich mara — sabrać na adnoj płatformie 400 miljonaŭ čałaviek (6% nasielnictva Ziamli), jakija buduć abjadnanyja adnoj spravaj. Nik kaža, što ŭsio, pra što jon maryŭ, ździejśniłasia; zastałosia tolki pieramahčy suśvietny hoład. Kali kožny dzień kožny čałaviek z hetaj supolnaści budzie achviaravać chacia b pa adnym dalary, heta budzie vielizarnaja dapamoha tam, dzie ŭ joj jość patreba.
Nik Vujčyč vałodaje nie tolki niejmaviernaj siłaj voli. Jon biaskonca pazityŭny, vielmi žvavy i pryhožy čałaviek ź jaskravym humaram. I biezumoŭna prafiesijny aratar. Słuchačy płakali i śmiajalisia, ścichali, sačyŭšy za jaho i svaimi dumkami, i ščyra dziakavali apładysmientami.
Jon vieryć u cud i trymaje ŭ šafie paru abutku na toj vypadak, kali hety cud adbudziecca. Ščyry chryścijanin, padkreślena akuratna stavicca da ŭsich inšych relihij i mierkavańniaŭ. Nik Vujčyč vučyć tamu, što niemahčyma zrabić lepšym inšaha čałavieka –- možna tolki samomu stać lepšym. Kali chočaš źmianić śviet, adziny šlach — samomu zrabicca hetaj źmienaj. I kaža, što, kali ciažka, nie varta čakać niejkaj dapamohi ad dziaržavy. Treba dapamahać adzin adnamu, i tolki heta budzie raźvivać dziaržavu: ekanomiku, zakanadaŭstva, kulturu.
Niekatoryja cytaty z vystupu Nika Vujčyča ŭ Minsku:
«U kožnaha z nas jość vybar: vieryć u ščaślivuju budučyniu ci nie vieryć. Ja vybraŭ vieryć. Nadzieja i viera jość va ŭsich, treba tolki vyrašyć, pryniać jaje ci nie. Ale razumiejcie, što kali vy nie budziecie šukać nadzieju, to nikoli jaje nie znojdziecie. Tady i budučyni ŭ vas nie budzie»
«Ja dumaŭ, što mianie zrobiać ščaślivymi ruki i nohi. I dakazaŭ sam sabie, što heta nie tak. Majo žyćcio, jak i žyćcio mnohich ludziej na Ziamli, było raźbita. Ale vy nie ŭjaŭlajecie sabie, jakija pryhožyja rečy možna zrabić z čarapkoŭ! Treba razumieć, chto vy i čaho chočacie. Ja zastanusia Nikam Vujčyčam, navat kali ŭ mianie nie budzie jazyka, i vačej, i vušej — tamu što maju dušu nichto nie moža ŭ mianie zabrać»
«Śmiełaść — heta nie adsutnaść strachu. Śmiełaść — heta rabić niešta navat tady, kali strašna. Kožny raz, kali my cierpim niaŭdaču -– my niečamu vučymsia. Kali ja vyrašyŭ, što chaču vystupać pierad ludźmi, ja patelefanavaŭ u 53 škoły, dzie chacieŭ vystupić. I tolki ŭ adnu ź ich mianie zaprasili. Z taho času ja sustreŭsia z šaściu miljonami čałaviek».
«U 13 hod ihraŭ u futboł i złamaŭ nahu. Pralažaŭ try tydni ŭ hipsie, upieryŭšysia ŭ stol. Voś tady ja zrazumieŭ, jak heta — być invalidam. I navučyŭsia canić toje, što ŭ mianie jość»
«Nahody dla stresu ci depresii možna znajści va ŭsich uzrostach. Dzieci nieščaślivyja, bo im nie kupili cacku. Padletki — tamu što ich nie razumiejuć. Junaki — praź luboŭnyja pieražyvańni. Studenty — bo niama hrošaj. Na pracy durny dyrektar. Nijak nie mahu ažanicca. Vy dumajecie, što aženiciesia i voś tady ŭžo narešcie budziecie ščaślivyja? Nie!!! Spytajciesia ŭ tych, chto ŭžo zrabiŭ heta. Kali vy nie ŭmiejecie być ščaślivymi ciapier, u tym stanie, jaki jość, vy nie budziecie ščaślivyja nikoli i nidzie»
«Ščaście — nie vynik pośpiechu. Ščaście — viedać svaju metu. Chaj vašy mary buduć značnyja. Budźcie ščyrymi. Budźcie ciarplivymi. Źmianiajcie toje, što možacie źmianić, i prymajcie toje, što nie možacie. Šukajcie ŭ sabie mudraść i ŭvasablajcie prystojnaść. Mary ździajśniajucca. Cudy zdarajucca»