Fiestyval hidaŭ i ekskursavodaŭ projdzie 23—24 krasavika
Fiestyval hidaŭ i ekskursavodaŭ projdzie ŭ vośmy raz u Biełarusi. Na sajcie fiestyvalu, jaki ŭ hetym hodzie adbudziecca 23—24 krasavika, pačaŭsia papiaredni zapis na biaspłatnyja ekskursii, jakija projduć pa ŭsioj krainie.
Arhanizatary adznačajuć, što maršruty i temy ekskursij u ramkach fiestyvalu stvarajucca dla taho, kab «miascovyja žychary mieli mahčymaść lepš spaznać miesca, dzie jany žyvuć».
U hetym hodzie ekskursii adbuducca ŭ Minsku, va ŭsich abłasnych haradach, u Hłybokim, Maładziečnie, Barysavie, Babrujsku, Budsłavie, Pinsku, Oršy, Krupkach, Połacku, Lidzie i Słucku. Heta tyja nasielenyja punkty, jakija ŭžo zajaŭleny ŭ prahramie, mahčyma, śpis papoŭnicca.
Idejny natchnialnik i inicyjatar fiestyvalu Cimafiej Akudovič paviedamiŭ: «U hetym hodzie budzie ekskursija ŭ Vialiki akademičny teatr opiery i baleta z unikalnaj historyjaj pra sam budynak, virtualnaja ekskursija pa Minskim zamčyščy. Z całkam novaha — ekskursija na minskija zavody-hihanty MAZ i MTZ, ekskursija z naviedvańniem spartyŭnaj kamandy pa amierykanskim futbole «Litviny».
Akramia taho, paabiacaŭ jon, budzie praviedziena ekskursija-lekcyja dla prafiesijanałaŭ pa stvareńni ekskursij dla invalidaŭ.
«Farmat mierapryjemstva ŭnikalny. Na siońnia anałahaŭ niama nidzie ŭ śviecie. Nam užo pastupiła zajaŭka z Ukrainy, ludzi chočuć, kab my padzialilisia vopytam praviadzieńnia takoha fiestyvalu. Nie vyklučana, što farmat moža vyjści i za ramki Biełarusi», — raspavioŭ kiraŭnik prajekta Guides.by i saarhanizatar fiestyvalu Viktar Kamiahin.
Poŭny śpis biaspłatnych ekskursij u Minsku i inšych haradach Biełarusi budzie apublikavany na aficyjnym internet-resursie fiestyvalu guides.by/fest.
Fiestyval hidaŭ i ekskursavodaŭ paŭstaŭ u 2009 hodzie z metaj aznajomić žycharoŭ kankretnych rehijonaŭ i haradoŭ z tymi miaścinami, pobač ź jakimi jany žyvuć. Mierapryjemstva pieraśleduje i hłabalnuju metu — aktyvizacyju «tvorčaj žyłki» ekskursijnaj spravy ŭ Biełarusi dla nastupnaha stvareńnia novych i cikavych turystyčnych maršrutaŭ i ekskursij.
U arhkamitet fiestyvalu ŭvachodziać: hramadskaja arhanizacyja «Biełaruski kamitet ICOMOS», upieršyniu Nacyjanalnaje ahienctva pa turyźmie Biełarusi, śpiecyjalizavany anłajn-prajekt ab ekskursijach i hidach Biełarusi Guides.by.