Palityka Alesia Łahvinca buduć sudzić za Dzień Voli
Aleś Łahviniec (źleva), fota Siarhieja Hudzilina
Na adnaho z arhanizataraŭ akcyi na Dzień Voli, namieśnika staršyni Ruchu «Za Svabodu» Alesia Łahvinca skłali pratakoł za ŭdzieł u akcyi 25 sakavika. 28 krasavika adbudziecca sud, paviedamlaje pres-słužba ruchu «Za svabodu».
«25 sakavika, v 18.50 pa praśpiekcie Niezaležnaści, 73 u h. Minsku pryniaŭ aktyŭny ŭdzieł u niesankcyjavanym mitynhu biez dazvołu Minharvykankamu, što vyjaŭlałasia ŭ sumiesnym masavym znachodžańni hramadzianaŭ pa ŭkazanamu adrasu, vykrykivaŭ łozunhi, čym parušyŭ praduhledžany art. 10 Zakona RB «Ab masavych mierapryjemstvach»», — skazana ŭ pratakole za podpisam starejšaha ŭčastkovaha inśpiektara Savieckaha RUUS Minska Vitalija Jermałoviča.
Pa jahonych dadzienych, u dziejańniach Łahvinca zaŭvažanyja prykmiety parušeńnia artykuła 23.34 č.1 (parušeńnie paradku arhanizacyi ci praviadzieńnia masavych mierapryjemstvaŭ) KoAP.
«Bačna, što mnie pryjšoŭ «typovy pratakoł» na zajaŭnika Dnia Voli. Pratakoł — uzor milicejskaha farmalizmu i nieprafiesijnaści», — prakamientavaŭ sajtu Pyx.by Aleś Łahviniec.
Pa-pieršaje, kaža jon, «pratakoł ihnaruje fakt, što «sumiesnaje masavaje znachodžańnie» hramadzianaŭ pa adrasie pr-t Niezaležnaści, 73 było dazvolenaje Minharvykankamam jak miesca zboru ŭdzielnikaŭ śviatkavańnia».
«Pa-druhoje, jak arhanizatar ja znachodziŭsia na miescy zboru hramadzianaŭ, jakija navat pavodle vielmi niedemakratyčnaha zakonu «Ab masavych mieprapryjemstvach» majuć prava padčas zboru abmiarkoŭvać UHOŁAS mety i pryčyny ichnaha schodu. Jak arhanizatar ja začytaŭ zvarot Staršyni Rady BNR Ivonki Surviły da biełaruskaha narodu», — dadaŭ namieśnik staršyni ruchu «Za Svabodu».
Jon taksama źviarnuŭ uvahu na toje, što u «starejšaha lejtenanta Vitalija Jermałoviča, vidać, źbiŭsia hadzińnik, bo zvarot staršyni Surviły ja začytaŭ a 18.30, a nie a 18.50».
«Nieprafiesijanalizm milicyi taksama prajaŭlajecca ŭ tym, što jany admaŭlajucca pierakryć ruch transpartu na momant pierasiačeńnia vulicaŭ udzielnikami šeścia. Prymušajučy ludziej praz pahrozy i zapužvańni spyniacca na pierakryžavańniach, jany stvarajuć istotnyja pahrozy dla žyćcia i zdaroŭja ŭdzielnikaŭ masavych mierapryjemstvaŭ», — zaklučyŭ Aleś Łahviniec.
Sud pa spravie namieśnika staršyni Ruchu pryznačany na 17:00 28 krasavika ŭ sudzie Centralnaha rajona Minsku. Sudździa na pracesie — Natalla Vajciachovič.