U pieršym kvartale prodaž biełaruskich «MAZaŭ» u Rasii źmienšyŭsia na 40%
U studzieni—sakaviku 2016 hoda ŭ Rasii było pradadziena 617 novych hruzavych aŭtamabilaŭ Minskaha aŭtamabilnaha zavoda. Takija źviestki pryvodzić rasijskaje analityčnaje ahienctva «Avtostat», jakoje śpiecyjalizujecca na vyvučeńni rynku transpartnych srodkaŭ Rasii.
Varta zaznačyć, što ŭ pieršym kvartale ŭ Rasii było pradadziena 10,1 tys. adzinak novych hruzavych aŭtamabilaŭ, što na 23,7% mienš, čym za anałahičny pieryjad 2015 hoda. Pry hetym temp źnižeńnia prodažu biełaruskich hruzavych aŭtamabilaŭ «MAZ» na rasijskim rynku apynuŭsia jašče bolšym, paviedamlaje «Avtostat». Tak, kali ŭ pieršym kvartale 2015 hoda byli realizavanyja 1.053 hruzavyja aŭtamabili «MAZ» (masaj bolš za 3,5 tony), to za anałahičny pieryjad 2016 hoda — 617 aŭtamabilaŭ.
Varta zaznačyć, što prodaž adnaho z asnoŭnych kankurentaŭ minskaha aŭtazavoda na rasijskim rynku — KAMAZa — taksama niekalki źnizilisia, adnak u značna mienšaj stupieni, čym u biełaruskaha vytvorcy. U studzieni—sakaviku 2016 hoda kamski aŭtazavod pradaŭ na rasijskim rynku 4.298 hruzavych aŭtamabilaŭ, što na 2,8% mienš u paraŭnańni ź pieršym kvartałam 2015 hoda.
Pry hetym dola KAMAZa ŭ ahulnym abjomie prodažu na rasijskim rynku novych hruzavych aŭtamabilaŭ skłała ŭ pieršym kvartale 2016 hoda 42,6% i pavialičyłasia ŭ paraŭnańni z anałahičnym pieryjadam minułaha hoda na 9,3 pracentnaha punkta. Dola biełaruskaha MAZa ŭ ahulnym abjomie prodažu novych hruzavych aŭtamabilaŭ u Rasii skłała ŭ studzieni—sakaviku 2016 hoda 6,1% i źniziłasia ŭ paraŭnańni z anałahičnym pieryjadam minułaha hoda na 1,9 pracentnaha punkta.
Nahadajem, 7 krasavika Minski aŭtamabilny zavod naviedvaŭ Alaksandr Łukašenka. Kiraŭnik dziaržavy zajaviŭ, što dziaržpadtrymka pradpryjemstvu moža być akazanaja tolki pad kankretnyja rynki zbytu. «Vy atrymajecie hrošy, mahčyma i kitajskija kredyty, tolki tady, kali pakažacie, što ŭ vas jość rynki, kudy pradaście hetuju pradukcyju. U advarotnym vypadku nie damo ni kapiejki», — skazaŭ jon.
Kažučy pra asvajeńnie novych rynkaŭ zbytu, Łukašenka zaŭvažyŭ, što ŭžo daŭno i nastojliva stavić adpaviednuju zadaču pierad Minskim aŭtamabilnym zavodam. «Ja ad vas hetaha patrabuju. A to nie paśpieŭ ja siudy pryjści, jak vy mnie pačali raskazvać pra Rasiju (rasijski rynak). My ŭžo 25 hadoŭ jak niezaležnaja dziaržava. U Rasii svaje prablemy. Tak, tam rynak, jaki vy zdali. Siońnia hety rynak vielmi lohka advajavać. Ale tudy treba pradać jakasnuju, pryhožuju, nadziejnuju techniku pa kankurentnaj canie», — zajaviŭ kiraŭnik dziaržavy.