Za spakušeńnie dziaciej u sacsietkach i zachoŭvańnie dziciačaj parnahrafii płanujecca ŭvieści kryminalnuju adkaznaść
Na hetaj siesii Pałaty pradstaŭnikoŭ Nacyjanalnaha schodu Biełarusi płanujecca zakanadaŭča zamacavać kryminalnuju adkaznaść za «schileńnie dziaciej da sieksualnaj suviazi z dapamohaj znosin u internecie», a taksama za zachoŭvańnie dziciačaj parnahrafii.
Pra heta paviedamiŭ namieśnik staršyni pastajannaj kamisii pa achovie zdaroŭja, fizičnaj kultury, siamiejnaj i maładziožnaj palitycy Vadzim Dzieviatoŭski 19 krasavika na plenarnym pasiadžeńni 6-j mižnarodnaj kanfierencyi «Biaśpiečnaja Biełaruś dla dziaciej: u śviecie bieź miežaŭ», jakaja prachodzić u Minsku 18—22 krasavika.
«Jość dzieci, jakija sutyknulisia z hvałtam, i heta losy złamanyja, mahčyma, na ŭsio žyćcio, — skazaŭ jon. — Tut naša zadača, pa-pieršaje, prafiłaktyka hvałtu, pa-druhoje, minimizacyja nastupstvaŭ, kab dzicia vyjšła ź vielmi składanaj stresavaj situacyi, pieraadoleŭšy jaje».
«Za toje, kab hetyja ludzi traplali pad kryminalnuju adkaznaść, u nas prajšło niekalki abmierkavańniaŭ i ŭzhadnieńniaŭ z udziełam śpiecyjalistaŭ, i siońnia my na finišnaj pramoj, — skazaŭ Dzieviatoŭski. — Usie zacikaŭlenyja baki vykazalisia, pryjšli da ŭzajemarazumieńnia. Vielmi spadziajusia, što na viasieńnie-letniaj siesii miery, jakija my prapanujem, buduć pryniatyja».
Pry hetym Dzieviatoŭski padkreśliŭ, što «tolki ŭzmacnieńniem kryminalnaj adkaznaści hetaj prablemy nie vyrašyć, bo mohuć paciarpieć nievinavatyja». Pavodle jaho słoŭ, u vyrašeńni hetaj prablemy Biełaruś «pojdzie svaim šlacham, abapirajučysia na zamiežny vopyt».
«Pačać treba z administracyjnaj adkaznaści, tamu mnohija vykazvalisia, što adrazu kryminalnaje pakarańnie — zanadta žorstki krok dla taho, chto spatyknuŭsia, nie tudy zalez u internecie, vypadkova zapampavaŭ fajł, abo jaho padkinuli, i hetak dalej», — ličyć parłamientaryj.
«Tut my budziem vykarystoŭvać vopyt zamiežnych śpiecyjalistaŭ, jakija ŭ siabie minimizujuć nastupstvy dla sapraŭdy nievinavatych, jakija trapili vypadkova, — rastłumačyŭ parłamientaryj. — Dla hetaha za miažoj jość prahramy, raspracavanyja miechanizmy dla vyjaŭleńnia złoha namieru».
6-ja mižnarodnaja kanfierencyja «Biaśpiečnaja Biełaruś dla dziaciej: u śviecie bieź miežaŭ», jakaja prachodzić u Minsku, sabrała bolš za 250 čałaviek. Udzielničajuć u forumie pradstaŭniki orhanaŭ zakanadaŭčaj i vykanaŭčaj ułady, dziaržkiravańnia, hramadskich arhanizacyj, VNU, mižnarodnyja ekśpierty, pradstaŭniki mižuradavych arhanizacyj, a taksama dzieci i ich zakonnyja pradstaŭniki.