Biełaruskaja partyja levych «Spraviadlivy śviet» patrabuje viarnuć ilhoty likvidataram avaryi na ČAES
Biełaruskaja partyja levych «Spraviadlivy śviet» patrabuje ad uładaŭ pryniaćcia novaha zakona ab sacyjalnaj abaronie likvidataraŭ avaryi na Čarnobylskaj AES i hramadzian, jakija pražyvajuć na paciarpiełych terytoryjach, havorycca ŭ zajavie, pryniataj 23 krasavika na pasiadžeńni biuro centralnaha kamiteta partyi.
Hety zakon, ličać u arhanizacyi, pavinien praduhledžvać u tym liku «viartańnie likvidataram ŭsich adabranych ilhotaŭ i sacyjalnych harantyj».
Akramia taho, partyja zaklikaje ŭłady pryniać «doŭhaterminovuju kompleksnuju prahramu pa adnaŭleńni infrastruktury i sacyjalnaj śfiery rehijonaŭ, paciarpiełych ad vybuchu na Čarnobylskaj AES, vyrašeńnia nazapašanych tam prablem».
U zajavie adznačajecca: paśla avaryi «z vysokich dziaržaŭnych trybun rabilisia zajavy ab tym, što paciarpiełyja terytoryi buduć całkam adnoŭleny i ludziam, jakija pražyvajuć na ich, budzie zabiaśpiečany ŭzrovień žyćcia, supastaŭny z samymi zamožnymi krainami śvietu». «Adnak praz 30 hadoŭ nieabchodna kanstatavać, što ŭzrovień žyćcia ŭ bolšaści paciarpiełych rajonach źniziŭsia. Biespracoŭje, zaniapad ekanomiki, nizki ŭzrovień miedycynskaha absłuhoŭvańnia i sacyjalnaj abarony, abyjakavaść ŭłady - takaja siońniašniaja realnaść dla ludziej, apalenych Čarnobylem», - havorycca ŭ dakumiencie.
«Pieršy ŭdar na siabie pryniali likvidatary avaryi. Mienavita jany pryjšli na dapamohu ludziam, jakija apynulisia ŭ biadzie. Adnak praz 25 hadoŭ u biełaruskich likvidataraŭ ukazam prezidenta adabrali ŭsie sacyjalnyja lhoty. Dziaržava praktyčna zabyłasia na tych, chto, ryzykujučy žyćciom i zdaroŭjem, braŭ udzieł u likvidacyi nastupstvaŭ jadziernaha vybuchu. Nieabchodna adznačyć, što našy susiedzi, Rasija i Ukraina, jakija mienš paciarpieli ad nastupstvaŭ Čarnobyla, tym nie mienš zachavali likvidataram ŭsie lhoty», - abhruntoŭvaje partyja svaje prapanovy.