ZŠA nie buduć pravodzić naziemnuju apieracyju ŭ Siryi
Prezydent ZŠA Barak Abama vyklučyŭ mahčymaść vykarystańnia amerykanskich suchaputnych sił u Syryi, zajaviŭšy, što prablemy hetaj krainy niemahčyma vyrašyć tolki vajskovymi metadami.
«Heta było b pamyłkaj dla ZŠA ci dla Vialikabrytanii… pasłać naziemnyja vojski i skinuć režym Bašara Asada», — zajaviŭ Barak Abama ŭ interviju Bi-bi-si.
Jon taksama pryznaŭ, što siłam kaalicyi pad kiraŭnictvam ZŠA nia ŭdasca pieramahčy hrupoŭku «Isłamskaja dziaržava» za nastupnyja dzieviać miesiacaŭ, jakija jon budzie zastavacca na prezydenckaj pasadzie.
«My možam tolki zvuzić zonu ich dziejańniaŭ», — skazaŭ Abama.
Barak Abama, jaki naviedaŭ Vialikabrytaniju z trochdzionnym vizytam, pryznaŭ, što ŭ Syryi skłałasia «dušaraździralnaja sytuacyja vielizarnaj składanaści».
«Adnymi tolki vajskovymi metadami, u tym liku, viadoma, i razhortvańniem tam našych suchaputnych vojskaŭ, doŭhaterminovyja prablemy ŭ Syryi nia vyrašyć», — zajaviŭ Abama.
Jon paabiacaŭ, tym nia mienš, što ŭznačalenaja Złučanymi Štatami kaalicyja budzie praciahvać nanosić pavietranyja ŭdary pa bajavikach hrupoŭki «Isłamskaja dziaržava» u Raccy i ŭ inšych jaje asnoŭnych apornych punktach.
Kaalicyja, pavodle jaho słoŭ, taksama budzie imknucca izalavać rajony, jakija znachodziacca pad kantrolem IDzIŁ, i blakavać tyja častki krainy, adkul ekstremisty nakiroŭvajuć zamiežnych bajevikoŭ u Eŭropu.
Pa źviestkach mižnarodnych arhanizacyj, prynamsi čverć miljona čałaviek zahinuli ŭ chodzie piacihadovaha kanfliktu ŭ Syryi, miljony miascovych žycharoŭ stali ŭciekačami, pakinuŭšy svaje damy ŭ zonie bajavych dziejańniaŭ.