Polski analityk: Nastupnaj paśla Italii dla Łukašenki moža być Aŭstryja
Vydańnie ŭrada Rasii «Rośsijskaja hazieta» paviedamiła, što ŭ piatnicu Alaksandr Łukašenka ździejśnić pieršy vizit u Jeŭrasajuz paśla źniaćcia sankcyj. Pres-sakratarka kiraŭnika dziaržavy Natalla Ejsmant paćvierdziła, što takaja pajezdka sapraŭdy značycca ŭ płanach.
My paprasili prakamientavać budučy vizit polskaha analityka z Centra ŭschodnich daśledavańniaŭ Kamila Kłysinskaha.
«Heta naturalna, što Alaksandr Łukašenka sprabuje ŭznavić kantakty ź Jeŭropaj paśla źniaćcia sankcyj mienavita ź Italii. Tut jość peŭnyja napracoŭki, byŭ vizit u 2009 hodzie kiraŭnika Biełarusi ŭ Italiju i Vatykan.
Ułady Italii zaŭsiody vielmi prahmatyčna stavilisia da režyma Łukašenki. Jašče raz paŭtaru, kali pačynać, to mienavita ź Italii, bo tam biełaruskija arhumienty mohuć być pačutyja.
Što tyčycca Vatykana, to adnosiny z katalickaj carkvoj vyhladajuć vielmi važnymi dla Łukašenki. Zdajecca, jon usio jašče razhladaje Vatykana ŭ roli sajuźnika padčas dyjałohu ź Jeŭropaj. Nie treba adkidać i ambicyi Łukašenki, jaki chacieŭ by zładzić sustreču kiraŭnikoŭ katalickaj i pravasłaŭnaj cerkvaŭ u Biełarusi.
Vizit u Italii važny mienavita jak pačatak vybudoŭvańnia pryjaznych adnosin z krainami Jeŭropy. Z historyi možna skazać, što my nie viedajem, nakolki doŭha moža praciahnucca taki pieryjad. Šmat što budzie zaležyć ad chutkich parłamienckich vybaraŭ u Biełarusi. Kali jany projduć mirna i spakojna, a ŭ niejkaj stupieni i svabodna, to takoje supracoŭnictva praciahniecca. Možna skazać, što ad vybaraŭ zaležyć, ci budziem my nadalej bačyć Łukašenka ŭ jeŭrapiejskich sałonach.
Prahnazavać nastupnyja vizity — niaŭdziačnaja sprava. Adnak možna vykazać zdahadku, što nastupnaj krainaj Jeŭropy, kudy moža pryjechać Łukašenka, moža stać Aŭstryja. My nazirajem narastańnie intensiŭnaści kantaktaŭ. Letaś u Minsku było adkryta pasolstva Aŭstryi, chutka ŭ Vienie projdzie aŭstryjska-biełaruski inviestycyjny forum».