Pašyrany pieralik kamunalnych pasłuh, za jakija nie spahaniajecca płata pry praciahłaj adsutnaści pa miescy žycharstva
U Biełarusi pašyrany śpis kamunalnych pasłuh, za jakija nie spahaniajecca płata pry praciahłaj (bolš za 10 dzion) adsutnaści hramadzianina pa miescy žycharstva. Hetyja źmieny va ŭkaz prezidenta № 535 «Ab pradastaŭleńni žyllova-kamunalnych pasłuh» uniesieny pastanovaj Savieta ministraŭ № 334 ad 25 krasavika, jakaja apublikavana na Nacyjanalnym pravavym internet-partale.
Da uniesienych źmianieńniaŭ płata nie brałasia za vyvaz ćviordych kamunalnych adchodaŭ, chałodnaje i haračaje vodazabieśpiačeńnie, kanalizacyju i hazazabieśpiačeńnie. Ciapier taksama nie pryjdziecca płacić za elektrazabieśpiačeńnie lifta.
Hramadzianie mohuć być vyzvalenyja ad apłaty nazvanych radkoŭ u žyroŭcy, kali daŭžej čym na 10 dzion adpraŭlajucca: za miažu, na azdaraŭleńnie, lačeńnie, prachodžańnie vajennaj słužby (u tym liku na słužbu ŭ reziervie abo śpiecyjalnyja zbory), vyjazdžajuć u sielskija nasielenyja punkty (u tym liku na leciščy), na vučobu, u kamandziroŭku, na pracu pa pracoŭnym dahavory ŭ arhanizacyi, raźmieščanyja ŭ čarnobylskich rajonach.
Akramia taho, vyzvalajucca ad apłaty nazvanych kamunalnych pasłuh tyja, chto vyjazdžaje na pracu ŭ jakaści baćkoŭ-vychavacielaŭ u dziciačych damach siamiejnaha typu, a taksama asoby, jakija nakiroŭvajucca ŭ inšyja nasielenyja punkty dla dohladu za invalidam I hrupy abo asoby, jakaja dasiahnuła 80-hadovaha ŭzrostu i patrabuje pastajannaha dohladu.
Dla vyzvaleńnia ad apłaty nieabchodna papiarednie paviedamić ab svajoj adsutnaści kamunalnym słužbam, a pa viartańni (nie paźniej čym praz tydzień paśla pryjezdu) pradstavić dakumienty, jakija paćviardžajuć vyjezd.
Da takich dakumientaŭ adnosiacca: prajaznyja bilety, adznaki ŭ pašparcie ab pierasiačeńni miažy abo dakumient z adznakaj ab rehistracyi pa miescy žycharstva za miažoj; daviedka ab prachodžańni lačeńnia abo azdaraŭleńnia ź miedustanovy; pry letnim vyjeździe na dačnyja ŭčastki — daviedka ź sielsavieta, pasiałkovaha vykankama ci sadavodčaha kaapieratyva.
Pastanova Saŭmina nabyła moc.