«Jeŭrabačańnie» admoviłasia pierahladać vyniki konkursu
Arhanizatar konkursu «Jeŭrabačańnie» adkazaŭ na pietycyju z patrabavańniem pierahledzieć vyniki spabornictva. U adkazie padkreślivajecca, što Ukraina «jość i zastaniecca pieramožcam» Jeŭrabačańnia-2016.
tass.ru
Adkaz aŭtaram pietycyi ab pierahladzie vynikaŭ «Jeŭrabačańnia», dzie pieramahła ŭkrainskaja śpiavačka Džamała, apublikavany na aficyjnaj staroncy konkursu ŭ Facebook.
«Jeŭrabačańnie» — heta konkurs. U im moža być tolki adzin pieramožca. My razumiejem, što nie ŭsie zhodnyja z vynikami konkursu «Jeŭrabačańnie» ŭ hetym hodzie, adnak u spabornictvie, dzie vyniki vyznačajucca na padstavie subjektyŭnaj i čaściakom vielmi indyvidualnaj dumki, zaŭsiody znojducca ludzi, jakija buduć nie zhodnyja», — havorycca ŭ paviedamleńni.
Videa, u jakim paviedamlajecca ab tym, što vyniki «Jeŭrabačańnia» nie buduć pierahledžany, źjaviłasia taksama na aficyjnaj staroncy arhanizatara konkursu, Jeŭrapiejskaha viaščalnaha sajuza (EBU).
U paviedamleńni na staroncy «Jeŭrabačańnia» pakazvajecca, što vyniki konkursu zastanucca ŭ sile ŭ adpaviednaści z praviłami, jakija byli viadomyja ŭsim udzielnikam Jeŭrapiejskaha viaščalnaha sajuza, vykanaŭcam i prychilnikam.
«Ukraina jość i zastaniecca pieramožcam «Jeŭrabačańnia» ŭ 2016 hodzie. Zhodnyja vy z hetym ci nie, my zaklikajem tych, chto padpisaŭ pietycyju vitać vynik, jaki adpaviadaje praviłam, i praciahnuć kanstruktyŭny dyjałoh ab šlachach dalejšaha ŭmacavańnia i palapšeńnia «Jeŭrabačańnia», — adznačajecca ŭ adkazie aŭtaram pietycyi.
U zajavie taksama padkreślivajecca, što pieramožcy konkursu vyznačali prafiesijanały muzyčnaj industryi i hledačy, čyje hałasy adbilisia na vynikach ŭ roŭnaj stupieni. «Pradstaŭnica Ukrainy Džamała pieramahła dziakujučy šyrokaj padtrymcy jak z boku žury, tak i z boku hledačoŭ», — adznačajecca ŭ paviedamleńni.
«Dami Im z Aŭstralii vyjhrała hałasavańnie žury, rasijanin Siarhiej Łazaraŭ vyjhraŭ telehałasavańniem. Jany abodva zasłuhoŭvajuć pavahi za ich pieršakłasnyja vystupy i cudoŭnyja pieśni i za toje, što ŭspryniali parazu jak sapraŭdnyja prafiesijanały. Mahčyma, jany nie vyjhrali konkurs, ale adreahavali na vyniki jak pieramožcy. My pavažajem i cenim ich za heta», — padkreślivajecca ŭ paviedamleńni.