Kala ambasady ZŠA ŭ Minsku prajšoŭ pikiet u padtrymku pravoŭ homaseksuałaŭ
17 maja adznačaŭsia Mižnarodny dzień baraćby suprać hamafobii i transfobii. U hety dzień hrupa hramadskich aktyvistaŭ praviali ŭ centry Minska hramadskuju infarmacyjnuju akcyju.
Spačatku jany sabralisia kala stancyi mietro «Niamiha», dzie raspaŭsiudžvali ŭlotki, u jakich raspaviadajecca ab parušeńniach pravoŭ homaseksuałaŭ, ab zabaronie dyskryminacyi pa prykmiecie seksualnaj aryjentacyi.
U 13 hadzin aktyvisty sabralisia kala ambasady ZŠA i praviali pikiet salidarnaści z hramadzianami hetaj krainy pa pytańni lehalizacyi adnapołych šlubaŭ.
Pikiet, jaki doŭžyŭsia paŭhadziny, pryciahnuŭ pilnuju ŭvahu pradstaŭnikoŭ siłavych struktur i ludziej u cyvilnym, jakija staranna fiksavali padzieju na videakamiery. Adnak, jak paviedamili naziralniki, udzielnikaŭ akcyi pry hetym nie zatrymlivali i jany spakojna razyjšlisia.