Firmu Mikałaja Aŭtuchoviča pazbavili licenzii
Mikałaj Aŭtuchovič
Aktyvist ličyć heta pomstaj z boku čynoŭnikaŭ ź Ministerstva transpartu.
Rašeńnie pryznačyć pradprymalnika Mikałaja Aŭtuchoviča lidaram ruchu salidarnaści «Razam» było pryniata na źjeździe arhanizacyi 15 traŭnia. A napiaredadni jon daviedaŭsia, što jaho firmu «Nika-taksi 22222» pazbavili licenzii, paviedamlaje sajt palitviazni.info.
«Čynoŭniki, mahčyma, vyrašyli, što Aŭtuchoviču čas zakryć rot, — raspavioŭ Mikałaj Aŭtuchovič. — Maŭlaŭ, treba adpomścić. A ja na samaj spravie nie raz pakazvaŭ, jak nieprafiesijna pracujuć transpartniki. Tyja razzłavalisia, dasłali pravierku, i, jak śledstva, — pazbavili licenzii. Heta pomsta!»
«Ja nie adrazu pahadziŭsia ŭznačalić ruch, ale, u rešcie rešt, mianie pierakanali heta zrabić, — raspaviadaje Mikałaj ab svajoj novaj pasadzie. — Choć adkaznaść, biezumoŭna, vialikaja, razumieju heta. Ale ja adkazny čałaviek, i kali biarusia za niejkaje spravu, to starajusia rabić jaje sumlenna. Tamu što nie lublu kidacca pustymi słovami i nie chaču hublać toj aŭtarytet, jaki zarabiŭ za svajo žyćcio».
Pa słovach Mikałaja Aŭtuchoviča, jaho biznes u Vaŭkavysku nie stanie pieraškodaj dla pracy ŭ ruchu pa toj prostaj pryčynie, što na dniach firmu pazbavili licenzii.
«U minułuju piatnicu na firmu patelefanavali i paviedamili, što ŭ nas zabrali licenziju, — raspaviadaje jon. — Papiaredzili, što pracavać jašče zmožam dva tydni. A licenzii pazbavili tolki za toje, što adzin z našych rabotnikaŭ svoječasova nie zmoh prajści techahlad. Darečy, za hetaje parušeńnie my jašče ŭ śniežni minułaha hoda atrymali pakarańni — tady abłasny haspadarčy sud Horadni pakaraŭ nas štrafam, jaki my apłacili. Darečy, heta było pieršaje parušeńnie, i nas mahli prosta papiaredzić. A ciapier jak minimum 25 čałaviek akažucca biez pracy. i ŭ kožnaha jość siemji, chtości ŭziaŭ kredyty… A znajści pracu ŭ rajonnym centry — praktyčna niemahčyma».
Aŭtuchovič ličyć, što abskardzić hetaje rašeńnie transpartnikaŭ nie maje sensu.
«Nas ceły hod bili ni za što, čaplalisia da kožnaj drobiazi, — praciahvaje surazmoŭca. - Na niadaŭniaj sustrečy ź ministram transpartu ja raspavioŭ ab situacyi, jakaja skłałasia. U nas ceły stos dakumientaŭ, jakija źbirajemsia pieradać u prakuraturu. Tam papachvaje pieravyšeńniem słužbovych paŭnamoctvaŭ i niezakonnaj pieraškodaj pradprymalnictvu. I dziaržava taksama hublaje. Zaraz, naprykład, my nie budziem kožny dzień kuplać 200 litraŭ dyzielnaha paliva, zapčastki, nie budziem płacić padatki. Čynoŭniki hetaha nie razumiejuć». Były palitviazień kaža, što ciapier, biez asnoŭnaha miesca pracy, skancentrujecca na spravach ruchu salidarnaści «Razam».
«Ja biez pracy nie zastanusia, — dadaje jon. — Ale škada tych ludziej, jakija pracavali na firmie, jakich dziaržava ŭziała i vykinuła na vulicu».