Davydźka: «Elitnyja damy budujuć nie tolki čynoŭniki, ale i narmalnyja ludzi»
«Elitnyja damy budujuć nie tolki čynoŭniki, ale i narmalnyja ludzi», — zajaviŭ staršynia Biełteleradyjokampanii Hienadź Davydźka ŭ efiry «Kłuba redaktaraŭ», kamientujučy artykuł u «Sovietskoj Biełoruśsii».
Vydańnie Administracyi prezidenta apublikavała repartaž z katedžnych pasiołkaŭ u Minsku, Breście i Homieli. Materyjał nazyvaŭsia «Chto ŭ katedžach žyvie? Našy ludzi». Žurnalisty prychodziać da vysnovy, što darahija damy mohuć sabie dazvolić samyja prostyja ludzi.
«Tut narešcie raspovied pra toje, što nie tolki čynoŭniki budujuć elitnyja damy, nie tolki niejkija nuvaryšy, a jašče narmalnyja ludzi, jakija vielmi navat nie drenna žyvuć», — pachvaliŭ publikacyju Hienadź Davydźka. — Hetaj publikacyjaj vy vybivajecie adnu z samych lubimych tem antydziaržaŭnych ŚMI. Što pahladzicie, jak čynoŭniki žyvuć… A jak zubatechniki žyvuć? A jak santechniki žyvuć u hetych ža katedžach? Tak što nie treba».
Pra pasiołki Drazdy i Viaśninka, dzie čynoŭniki biaspłatna atrymali ziamlu, košt jakoj pieravyšaje ich zarobak za dziasiatki hadoŭ pracy, u materyjale haziety niama ni słova.
«Mnie vielmi nie padabajecca taki hrech, jak zajzdraść. A tyja, chto sprabuje pierakanać čytačoŭ, što ŭsie hetyja katedžy na našaj šyi, heta kryvasmoki i hetak dalej… My zrabili rejd pa takich asnoŭnych miescach — jany kala kožnaha abłasnoha centra. Tam žyvuć nie staršyni i nie namieśniki abłvykankamaŭ, a žyvuć zvyčajnyja ludzi, jakija zmahli pabudavać sabie damy. A siońnia vielmi mnohija majuć takuju mahčymaść. Tamu materyjał suprać zajzdraści, plotak i inšych zahanaŭ», — prakamientavaŭ situacyju hałoŭny redaktar «Sovietskaj Biełoruśsii» Pavieł Jakubovič.
Nahadajem, što adzin z žycharoŭ «Drazdoŭ-2» — niepasredna staršynia Biełteleradyjokampanii Hienadź Davydźka.
Budoŭla Davydźki, archiŭnaje fota.
U toj ža čas redaktar «Sovietskaj Biełoruśsii» Pavieł Jakubovič pražyvaje na dačy jašče savieckaj pary — u Ždanovičach pad Minskam.