Brasłaŭski rajon stanie pieršym u Biełarusi klimatyčna niejtralnym municypalitetam
Da 2030 hoda Brasłaŭski rajon pavinien stać pieršym klimatyčna niejtralnym municypalitetam u Biełarusi, paviedamiŭ na pres-kanfierencyi ŭ Miensku 6 červienia kiraŭnik prajekta Dźmitryj Buronkin.
Pavodle jaho słoŭ, ahulny biudžet prajekta «Brasłaŭski rajon — pieršy klimatyčna niejtralny municypalitet u Biełarusi», jaki realizujecca Brasłaŭskim rajvykankamam i Centram ekałahičnych rašeńniaŭ pry finansavaj padtrymcy Jeŭrasajuza, skłaŭ 735 tys. jeŭra. Ź ich Jeŭrasajuzam vydzielena 584 tys. jeŭra. Termin realizacyi prajekta — vierasień 2018 hoda.
Pieršyja kroki da taho, kab zrabić rajon bolš čystym, byli zroblenyja ŭ 2014 hodzie, kali Brasłaŭ padpisaŭ mižnarodny Pakt meraŭ, uziaŭšy na siabie ambicyjnyja mety pa źnižeńni vykidaŭ na 20% da 2020 hoda, adznačyŭ Buronkin. Dalejšaja dziejnaść u rajonie budzie nakiravanaja na źnižeńnie jaho zaležnaści ad haručych vykapniaŭ, pašyreńnie vykarystańnia enierhaefiektyŭnych technałohij i raźvićcio adnaŭlalnaj enierhietyki, skaračeńnie vykidaŭ parnikovych hazaŭ, papularyzacyju zialonaha transpartu.
Adna z asnoŭnych metaŭ prajekta — źnizić enierhaspažyvańnie ŭ śfiery ŽKH na 15-20% pa kožnym mierapryjemstvie ŭ asobnaści, što daść ekanomiju enierhaspažyvańnia ŭ ahulnym da 2%, paviedamiŭ namieśnik staršyni Brasłaŭskaha rajvykankama Michaił Plisko.
«Ad ahulnaha enierhaspažyvańnia rajona, na jakoje vydatkoŭvajucca vialikija hrošy, heta vielizarnaja ličba, — rastłumačyŭ jon. — Da prykładu, uličvajučy, što za adzin aciaplalny siezon adna kacielnia na apłatu hazu addaje 6-7 młrd rubloŭ, to panižeńnie hetaj sumy navat na 1% ź pierachodam na bolš tannaje paliva vielmi ekanomić srodki».
Taksama, dadaŭ Buronkin, kaardynatary prajekta chočuć aktyŭna pryciahvać da enierhaźbieražeńnia nasielnictva rajona. U cełym, abjadnanyja namahańni daduć jak ekanamičny, tak i demanstracyjny efiekt, i dośvied Brasłaŭskaha rajona budzie prapanoŭvacca dla realizacyi ŭ inšych rehijonach krainy, skazaŭ jon.
Na praciahu 2016 hoda płanujecca ažyćciavić pieršyja dva mierapryjemstvy praktyčnaha ŭvasableńnia prajekta: zamiena ŭ Brasłavie častki truby centralnaha aciapleńnia horada (1.030 mietraŭ) na bolš enierhaefiektyŭnuju i zamiena 5% haradskoha lichtarnaha aśviatleńnia śviatłodyjodami.
Dalej pa prajekcie płanujecca ŭstanavić ciepłaabmieńniki u šmatpaviarchovych damach, nie padklučanych da sistemy centralnaha aciapleńnia, što dazvolić žycharam zimoj skaracić spažyvańnie elektraenierhii na nahravańnie vady ŭ bojlerach. Buduć zamienienyja staryja katły centralnaj kacielni, jakija pracujuć na torfie, na jakija vykarystoŭvajuć u jakaści paliva dranku abo sałomu. Płanujecca ŭstalavać soniečnyja kalektary na dziciačy sad, hramadskija miescy — abstalavać adnaŭlalnymi krynicami enierhii, źjavicca sietka arendy rovaraŭ, budzie raspracavany ekałahičny turystyčny maršrut z vykarystańniem elektratranspartu, adkryjecca hramadski infarmacyjny centr pa enierhaefiektyŭnaści. Dla ekanomii elektryčnaj enierhii na aśviatleńnie hramadskich budynkaŭ i padjezdaŭ žyłych damoŭ u ich ustalujuć datčyki huku i ruchu.