Ładućka prapanoŭvaje zbankrutavać Minski motaviełazavod
Fota: minsknews.by
Minski motaviełazavod prapanujuć bankrutavać. Z takoj prapanovaj vystupiŭ dyrektar pradpryjemstva, były kiraŭnik Minharvykankama Mikałaj Ładućka, pišuć «Minsk-Naviny».
Ładućka ŭznačaliŭ pradpryjemstva ŭletku 2015 hoda. Na kaliści šmattysiačnym zavodzie siońnia pracuje tolki kala 90 čałaviek. Paviedamlajecca, što «na płyvu» zastaŭsia adzin zboračny cech. Znošanaść enierhasietak składaje 100%.
Amal usie abstalavańnie raspradadzienaje papiarednim haspadarom zavoda, a toje, što zastałosia, sastareła. Za minułuju zimu aciapleńnie na zavodzie ŭklučali tolki na adzin miesiac, na bolšaje nie było hrošaj. Dach na pradpryjemstvie praciakaje, i nad niekatorymi pracoŭnymi miescami padviešanaja faniera, kab doždž nie liŭ za kaŭnier.
Pa słovach Ładućki, jon źviartaŭsia na biełaruskija pradpryjemstvy, kab daviedacca, chto moža niadoraha vypuskać kamplektujučyja da vieła- i motatechniki. Pastaŭščykoŭ nie znajšłosia.
Dyrektar ličyć, što AAT «Motavieła» treba pravieści praceduru bankructva. Tady ŭsia majomaść i ziamla piarojduć u kamunalnuju ŭłasnaść. Paśla hetaha na bazie pradpryjemstva možna budzie stvaryć respublikanski inavacyjny technapark abo vystavačny centr. Paru cechaŭ Ładućka pahadžajecca pakinuć dla vytvorčaści motaviełatechniki.
Druhim varyjantam jon nazyvaje vykarystańnie niedazahružanych pradpryjemstvaŭ pad vytvorčaść vieła- i motatechniki. Na ich jość nie tolki volnyja płoščy, ale i peŭnyja hrupy abstalavańnia. Zastaniecca tolki daŭkamplektavać vytvorčaść sučasnaj asnastkaj. Ale dla hetaha, kaža Ładućka, TAA «Motaviełazavod» musić pracavać u sistemie Ministerstva pramysłovaści.