U Viciebsku na vulicy Šahała novyja šyldy — biełaruskamoŭnyja
Častku vulicy «Praŭdy» pierajmienavali ŭ honar znakamitaha mastaka jašče ŭ sakaviku. Adnak šyldy pamianiali tolki ciapier, pryčym jany stali biełaruskamoŭnyja.
Najbližejšymi dniami damy na nievialikaj vulicy, jakaja idzie ad centralnaj, imia Lenina, da ŭźbiarežnaj, imia Kalinina, upryhožać nia tolki novyja šyldy z proźviščam Šahała. Ścieny piaci budynkaŭ vyrašyli razmalavać, i na adnym užo źjaviŭsia eskiz pracy Kazimira Maleviča. Darečy, dla razmaloŭki fasadaŭ zaprašajuć valanteraŭ, a tamu ŭ jakaści vuličnaha mastaka siabie moža pasprabavać navat amatar-pačatkoviec.
Budzie novy rośpis
Što jašče da Maleviča, to ŭ dvarach za budynkam byłoj mastackaj vučelni duet viciebskich mastakoŭ StreetSkills namalavaŭ jahony partret. Vyjava źjaviłasia na pabudovach haražnaha kompleksu, i Kazimir Malevič pakazvaje jakraz u bok kolišniaj navučalnaj ustanovy, stvoranaj ź inicyjatyvy Marka Šahała.
Pačynalnik suprematyzmu
Hety budynak nieŭzabavie stanie Muzejem viciebskaj mastackaj vučelni. Jon mieścicca na vulicy Šahała, i 24 červienia a 16-j hadzinie na im budzie adčyniena šylda ŭ honar mastaka: Šahał vykładaŭ u tut da 1920 hodu. A paśla, da 17.30, na novaj vulicy anansavana teatralizavanaje šoŭ i fłešmob, pryśviečanyja Marku Šahału i Kazimiru Maleviču.
Budynak budučaha muzeju jašče ramantujuć
Da adkryćcia muzeja jašče dalekavata. A voś prezentacyja vulicy imia Šahała ŭ abnoŭlenym vyhladzie prymierkavana da Dnia horada.
Na budynkach pa vulicy Šahała budzie čyrvonaja dachoŭka
Sioleta Viciebsk budzie adznačać svaje ŭhodki cełyja try dni. Siarod inšych imprezaŭ — adkryćcio pomnika Alaksandru Nieŭskamu, jakoje taksama adbudziecca, niahledziačy na šmatlikija pratesty haradžan, 24 červienia.
Dobraŭparadkavańnie vakoł pastamentu pad pomnik Alaksandru Nieŭskamu
25 červienia, siarod inšaha, projduć «Parad vyšyvanak» u kulturna-zabaŭlalnym kompleksie «Zadźvińnie» i «Śviata vietru» ŭ parku «Mazuryna», dzie buduć zapuskać pavietranych źmiejaŭ dy ładzić letni markiet z vyrabami narodnych majstroŭ (25 červienia). 26 červienia ŭ Viciebsku narešcie adčyniać memaryjalnuju došku ŭ honar paeta Davida Simanoviča, vialikaha patryjota rodnaha horadu, jaki šmat zrabiŭ dla ŭšanavańnia pamiaci i Marka Šahała, i Vasila Bykava, i Ŭładzimiera Karatkieviča. A na płoščy Pieramohi, siarod šerahu spartovych mierapryjemstvaŭ z udziełam BRSM, arhanizatary anansujuć akcyju «Razmaŭlaj pa-biełarusku».