Byłaja čynoŭnica Minabłvykankama pryhavoranaja da čatyroch hadoŭ pazbaŭleńnia voli
Sud Kleckaha rajona Minskaj vobłaści vynies prysud pa kryminalnaj spravie ab nieadnarazovym atrymańni chabaraŭ byłym hałoŭnym śpiecyjalistam upraŭleńnia antymanapolnaj i cenavaj palityki Minskaha abłvykankama.
Jak paviedamili BiełaPAN va ŭpraŭleńni pa baraćbie z ekanamičnymi złačynstvami UUS Minabłvykankama, žančyna była zatrymanaja apieratyŭnikami ŭ vieraśni minułaha hoda. Padčas apieratyŭna-vyšukovych mierapryjemstvaŭ supracoŭniki BEZ vyśvietlili, što ciapier užo byłaja čynoŭnica na praciahu piaci hadoŭ (z 2010-ha pa 2015-ty) nieadnarazova karystałasia svaim słužbovym stanoviščam, prymała niezakonnyja hrašovyja ŭznaharody ad indyvidualnych pradprymalnikaŭ i słužbovych asob handlovych pradpryjemstvaŭ, raźmieščanych na terytoryi Kleckaha, Kapylskaha, Niaśvižskaha, Staradarožskaha i Staŭbcoŭskaha rajonaŭ, za vyrašeńnie pytańnia ab stanoŭčym vyniku pravierak, jakija jana pravodziła, pa vykanańni abhruntavanaści farmiravańnia cen na sacyjalna značnyja hrupy tavaraŭ i niepryciahnieńni da adkaznaści pa vyjaŭlenych parušeńniach.
Jak praviła, hałoŭny śpiecyjalist upraŭleńnia antymanapolnaj i cenavaj palityki pry vyrašeńni pytańniaŭ, jakija ŭvachodzili ŭ jaje kampietencyju, abmiažoŭvałasia nievialikimi sumami chabaraŭ i praduktami charčavańnia. Tym nie mienš z časam «staŭki za pasłuhi» raśli. Usiaho padčas śledstva ŭstanoŭlena 24 fakty atrymańnia chabaru.
Sud Kleckaha rajona pryznaŭ byłuju čynoŭnicu vinavataj u nieadnarazovym atrymańni chabaraŭ i pryznačyŭ joj pakarańnie (na padstavie č. 2 art. 430 KK) u vyhladzie pazbaŭleńnia voli na čatyry hady z kanfiskacyjaj majomaści i pazbaŭleńniem prava zajmacca peŭnaj dziejnaściu na praciahu piaci hadoŭ.
Pakul pryhavor suda ŭ zakonnuju siłu nie ŭvajšoŭ i moža być abskardžany.