Pamior akcior Michaj Miesaraš, jaki hraŭ inšapłaniecianina Alfa
Cyrkavy artyst Michaj Miesaraš, jaki syhraŭ inšapłaniecianina pa mianušcy Alf u adnajmiennym telesieryjale kanca 1980-ch, pamior u ZŠA va ŭzroście 76 hadoŭ.
Jak paviedamiŭ žurnalistam mieniedžar artysta Denis Varha, niekalki dzion tamu Miesaraša ekstrana špitalizavali paśla taho, jak znajšli biesprytomnym u siabie doma.
Kala tydnia akcior znachodziŭsia ŭ komie, a zatym pamior, nie prychodziačy ŭ prytomnaść. Niepasrednuju pryčynu śmierci Varha, jaki siabravaŭ z akcioram z 1974 hoda, nazyvać nie staŭ.
Viadoma, što ŭ apošnija hady žyćcia Miesaraš ciažka chvareŭ i nie pracavaŭ. Varhu pryjšłosia pačać kraŭdfandynhavuju kampaniju, kab sabrać srodki na pachavańnie i apłatu miedycynskich rachunkaŭ.
Michaj Miesaraš naradziŭsia ŭ Vienhryi ŭ 1939 hodzie. U darosłym uzroście jaho rost składaŭ usiaho 83 santymietry, za što jaho prazvali «samym maleńkim čałaviekam u śviecie».
U 1970-ch hadach Miesaraš uładkavaŭsia pracavać u cyrk, a ŭ kancy 1980-ch jaho paklikali vykanać zahałoŭnuju rolu ŭ telesieryjale «Alf».
Miesaraš vykonvaŭ rolu rudoha inšapłaniecianina Hordana Šamueja, jaki prylacieŭ z zahinułaj płaniety Miełmak u Kaliforniju, dzie jaho prytuliła siamja Tanier.
Členy siamji prazvali inšapłaniecianina Alfam (ad anhlijskaha Alien Life Form — «inšapłanietnaja forma žyćcia») i sprabavali jaho adaptavać da ziamnoha žyćcia, ale nie zaŭsiody paśpiachova.
Pa scenary Alf, niahledziačy na salidny ŭzrost (229 hadoŭ), byŭ rostam ź dzicia. Tak jak kampjutarnaja hrafika tady nie była šyroka raspaŭsiudžana, na jaho rolu znajšli sapraŭdnaha akciora.
Usie 102 sieryi, kolki doŭžyłasia sieryjał, Miesaraš źjaŭlaŭsia ŭ kaściumie svajho pakrytaha doŭhaj rudaj poŭściu piersanaža.
Jaho sapraŭdnaha abličča mnohija prychilniki sieryjała nikoli nie bačyli.