Siamaška: AES płanavali z raźliku na burny rost ekanomiki, ale jaho nie zdaryłasia, i ciapier treba dumać, kudy padzieć lišak enierhii
30 červienia, vystupajučy na sumiesnym pasiadžeńni pałat parłamienta, vice-premjer Uładzimir Siamaška raspavioŭ, kudy ŭrad nakiruje lišak elektraenierhii, jaki ŭtvorycca paśla zapusku Biełaruskaj AES.
Biełaruskaja AES. Fota: Alaksandr Vasiukovič, tut.by
Uładzimir Siamaška raspavioŭ, što biznes-płan pa budaŭnictvie AES rychtavaŭsia ŭ 2008-2009 hadach z ulikam prahnozaŭ pa roście ekanomiki na piacihodku 2011-2015 hadoŭ. Adnak faktyčnyja pakazčyki pa minułaj piacihodcy akazalisia nižejšymi za prahnoznyja.
«Vy viedajecie, jak my zaviaršyli minułuju piacihodku i jakija miežy pastavili na hetuju. U razy tempy rostu ŭpali. Navat pry vykarystańni prahram enierhaefiektyŭnaści, jakija nadzvyčaj paśpiachova realizujucca ŭ Biełarusi, na kožny pracent rostu idzie prykładna 0,3-0,4% spažyvańnia enierhii. Pakolki zapłanavanaha pryrostu nie budzie, u nas utvaryŭsia lišak, — rastłumačyŭ vice-premjer. — Była raspracavanaja prahrama i stvoranaja pracoŭnaja hrupa pa pytańni, jak «źjeści» hetuju dadatkovuju enierhiju z karyściu dla enierhietykaŭ, atamnaj stancyi i narodnaj haspadarki».
Asnoŭnaja sistema mier zaklučajecca ŭ budaŭnictvie katłoŭ-nazapašvalnikaŭ pry ciepłavych stancyjach i stvareńni puskarehulujučych mahutnaściaŭ. Hety prajekt treba realizavać u bližejšyja 2,5-3 hady, paviedamiŭ Siamaška. Jon abydziecca ŭ 350-400 miljonaŭ dalaraŭ.
Zališniuju elektraenierhiju možna vykarystoŭvać taksama dla pracy novaha vidu haradskoha transpartu — elektrobusaŭ — i dla elektryfikacyi čyhunak.
«Kali pamiać mianie nie padmanvaje, u nas 18% čyhunačnych šlachoŭ elektryfikavana. Heta vielmi mała ŭ paraŭnańni ź viadučymi krainami śvietu, tamu nam treba surjozna hetym zajmacca», — skazaŭ Siamaška.
Jašče adna ideja pa vykarystańni liškaŭ — nakiravać ich na elektryfikacyju nasielenych punktaŭ u Čarnobylskaj zonie.
«U nas 60% Čarnobylskaj zony siońnia hazifikavana. Kali dacisnuć da 100%, treba adšukać jašče 13,2 tryljona rubloŭ. Kali pastavić bolš ścipłuju zadaču hazifikavać tolki ahraharadki, to možam abyścisia ŭ 2,5 tryljona rubloŭ. A na astatnija, niepierśpiektyŭnyja, viosački padvieści linii elektrapieradačy. Heta patrabuje značna mienšych vydatkaŭ, jašče 2-3 tryljony», — paviedamiŭ vice-premjer.
Nahadajem, zapusk pieršaha enierhabłoka BiełAES namiečany na 2018 hod.