Rasiejskija vytvorcy ahratechniki kryčać pra biełaruskija barjery
Rasijskija kampanii sutykajucca ź sistemnymi ciažkaściami pry pastaŭkach sielskahaspadarčaj techniki ŭ Biełaruś. Pra heta BiełaPAN zajavili ŭ rasijskim Sajuzie vytvorcaŭ sielhastechniki "Sajuzahramaš".
Tam paviedamili, što dadzienaja prablema abmiarkoŭvałasia 16 maja na kamisii pa taryfnym i nietaryfnym rehulavańni pry Saviecie ministraŭ sajuznaj dziaržavy ŭ Maskvie. Jak zaznačyŭ u svaim vystupleńni dyrektar "Sajuzahramaša" Jaŭhien Karčavy, "rasijskija vytvorcy paśpiachova ŭdzielničajuć u biełaruskich tenderach na pastaŭku sielskahaspadarčaj techniki, ale biełaruski bok štučna zaciahvaje vykanańnie svaich abaviazacielstvaŭ".
Tak, sioleta kampanija "Rostsielmaš" pieramahła ŭ konkursie na pastaŭku bujnoj partyi kambajnaŭ pa respublikanskaj prahramie "Asnaščeńnie sielskahaspadarčaj vytvorčaści sučasnaj technikaj na 2005—2010 hady". Adnak kantrakt va ŭstanoŭlenyja terminy zaklučany nie byŭ, i mašyny nie byli zakupleny. Adnačasova inšy rasijski vytvorca — kampanija "Klevier" — vyjhraŭ tender na pastaŭku ŭ Biełaruś 40 pratručvalnikaŭ nasieńnia PSM-25. Paśla pieradačy pieršych piaci mašyn u Homielskuju vobłaść zajaŭki na adhruzku pierastali iści. Kampanija "Mieljinviest" była vybrana pastaŭščykom 35 zierniesušylnych kompleksaŭ, ale realna było adhružana tolki dva.
Damoŭlenaść ab udziele rasijskaj techniki dla vioski ŭ biełaruskich respublikanskich konkursach była dasiahnuta ŭ 2007 hodzie pa inicyjatyvie "Sajuzahramaša" i pry padtrymcy rasijskich profilnych ministerstvaŭ. Ale zamiest čakanaj likvidacyi administracyjnych bar\jeraŭ praktykujecca parušeńnie ahulnapryniataj pracedury praviadzieńnia tenderaŭ i adychod ad vykanańnia ich vynikaŭ, zaznačyŭ Ja.Karčavy.
Jak ličać u rasijskim Sajuzie vytvorcaŭ sielhastechniki, Biełaruś z dapamohaj štučnych abmiežavańniaŭ imkniecca admovicca ad zakupak zamiežnych ahrarnych mašyn, u tym liku rasijskich. Miž tym, traktary, kambajny i inšaja sielskahaspadarčaja technika ź Biełarusi jak pradukcyja sajuznaj dziaržavy ŭklučana va ŭsie prahramy padtrymki ahrapramysłovaha kompleksu, što prymianiajucca ŭ Rasii. Pa vynikach pasiadžeńnia taryfnaj kamisii było pryniata sumiesnaje rašeńnie razabracca z adnabakovym raźvićciom handlu sielskahaspadarčaj techniki, paviedamili ŭ "Sajuzahramašy".