U budynak parłamienta Kosava kinuli vybuchovuju pryładu
Pra heta paviedamlaje Reuters sa spasyłkaj na palicejskaha, jaki znachodzicca na miescy padziej.
Incydent adbyŭsia ŭviečary ŭ čaćvier, u vyniku nichto nie paciarpieŭ. Paśla vybuchu na miesca pryjechała śpiecyjalnaje padraździaleńnie palicyi, jakoje ačapiła terytoryju vakoł budynka, raspavioŭ ahienctvu śviedka taho, što adbyłosia.
Ranicaj u čaćvier urad Kosava prapanavaŭ parłamientu ratyfikavać damovu ab miažy z Čarnahoryjaj. Dakumient źjaŭlajecca ŭmovaj dla taho, kab žychary Kosava zmahli bieź viz jeździć u Šenhienskuju zonu.
Suprać hetaha vystupajuć niekalki apazicyjnych partyj — jany śćviardžajuć, što pahadnieńnie pazbaŭlaje Kosava 8 tys. ha ziamiel. Adna z partyj zaklikała svaich prychilnikaŭ vyjści ŭ čaćvier da parłamienta, adnak natoŭp chutka razyšoŭsia, bo pytańnie ab pahadnieńni nie było pastaŭlenaje na paradak dnia.
Apošnim časam u Kosavie nazirajecca ŭzmacnieńnie palityčnaj napružanaści, adznačaje Reuters. Apazicyjnyja deputaty niekalki razoŭ raspylali ślezaciečny haz u budynku parłamienta, a ich prychilniki ŭdzielničali ŭ sutyknieńniach z palicyjaj. Akramia taho, u studzieni demanstranty padpalili budynak urada Kosava.
Pryčynami pratestaŭ stali pahadnieńnie z Čarnahoryjaj i ździełka ź Sierbijaj, jakaja praduhledžvaje stvareńnie ŭ Kosavie supolnaści sierbskich municypalitetaŭ z šyrokimi paŭnamoctvami.