Jarmošyna raskazała, u jakich vypadkach patencyjnym kandydatam u deputaty admoviać u rehistracyi
Staršynia CVK Biełarusi Lidzija Jarmošyna ŭ videazvarocie, raźmieščanym 4 žniŭnia na internet-partale Vybary-2016, raskazała, u jakich vypadkach patencyjnym kandydatam u deputaty Pałaty pradstaŭnikoŭ šostaha sklikańnia admoviać u rehistracyi, paviedamlaje BIEŁTA.
Lidzija Jarmošyna nahadała, što pa ŭsioj krainie kandydatami ŭ deputaty vyłučany 630 čałaviek, ciapier vybarčyja kamisii praviarajuć ich dakumienty, pa vynikach budzie pryniata rašeńnie ab rehistracyi abo admovie ŭ joj.
U pryvatnaści, u asob, jakija vyłučalisia šlacham zboru podpisaŭ, praviarajecca sapraŭdnaść podpisaŭ.
Dla pieršaj pravierki biarecca nie mienš jak 20 pracentaŭ, abo 200 podpisaŭ. Kali bolš za 15 pracentaŭ podpisaŭ ź liku pravieranych zabrakavany jak niedakładnyja, dla pravierki biarecca jašče 150 podpisaŭ. Kali suma takich podpisaŭ pa vynikach dźviuch pravierak pieravyšaje 15 pracentaŭ, kandydatu budzie admoŭlena.
Dla asob, jakija vyłučalisia ad pracoŭnych kalektyvaŭ, praviarajecca kolkaść rabotnikaŭ pradpryjemstva.
Na pradpryjemstvie pavinna pracavać nie mienš jak 300 čałaviek, a na schodzie pa vyłučeńni kandydata pavinna prysutničać bolš za 50 pracentaŭ ad kolkaści pracujučych.
Padstavami dla admovy taksama źjaŭlajucca: parušeńnie zakona inicyjatyŭnaj hrupaj u pieryjad vyłučeńnia (kali hrupie vynosilisia aficyjnyja papiaredžańni); kali kandydat u deputaty pradstaviŭ niedakładnuju dekłaracyju ab dachodach i majomaści abo nie pradstaviŭ jaje; kali jon nie pradstaviŭ zajavu ab zhodzie bałaciravacca kandydatam u deputaty.
Lidzija Jarmošyna taksama adznačyła, što ŭ suviazi sa źmianieńniami ŭ zakanadaŭstvie bałaciravacca kandydat u deputaty ŭ biahučym hodzie moža tolki pa adnoj vybarčaj akruzie.
Pavodle słoŭ kiraŭnika Centrvybarkama, vybarčyja kamisii pry praviercy dakumientaŭ źviartajuć asablivuju ŭvahu na takija momanty, jak akazańnie zamiežnaj dapamohi asobam, jakija vyłučajucca ŭ kandydaty. Hrubym parušeńniem zakanadaŭstva źjaŭlajecca złoŭžyvańnie słužbovym stanoviščam u intaresach vyłučeńnia i vybrańnia ŭ toj pieryjad, kali adbyvałasia vyłučeńnie.
Pa vynikach rehistracyi vybarkamy praviaduć losavańnie, i kožny kandydat atrymaje televizijny i radyjny čas dla vystupleńniaŭ. Akramia taho, kandydaty zmohuć biaspłatna apublikavać svaje pieradvybarnyja prahramy ŭ dziaržaŭnych ŚMI. Stvaryŭšy asabistyja finansavyja fondy, kandydaty zmohuć vieści bolš šyrokuju pieradvybarnuju ahitacyjnuju kampaniju i kuplać efirny čas, drukavanyja płoščy, vypuskać pieradvybarnyja listoŭki i h.d.