Łahviniec admaŭlaje, što płaciŭ hramadzianam za podpisy
Aleś Łahviniec
Namieśnik staršyni ruchu «Za svabodu» Aleś Łahviniec nia zhodny z vyniesienym jamu papiaredžańniem, u jakim akruhovaja vybarčaja kamisija Sucharaŭskaj vybarčaj akruhi № 101 śćviardžaje, što siabry inicyjatyŭnaj hrupy Łahvinca razdavali drukavanyja materyjały i płacili vybarnikam za podpisy.
«Akruhovaja kamisija vyrašyła vynieści papiaredžańnie […] za razdaču drukavanych materyjałaŭ vybarnikam padčas zboru podpisaŭ, a taksama za ŭznaharodžańnie vybarnikaŭ za ŭniasieńnie podpisaŭ u padpisnyja arkušy», — havorycca ŭ rašeńni akruhovaj kamisii.
Karystajučysia mahčymaściu asprečyć rašeńnie ŭ trochdzionny termin, Aleś Łahviniec padaŭ skarhu ŭ Mienskuju haradzkuju vybarčuju kamisiju.
Palityk śćviardžaje, što siabry jaho inicyjatyŭnaj hrupy nikoli nie płacili vybarnikam za podpisy:
«U vyniesienym rašeńni AVK adsutničaje spasyłka na toje, kali, kim mienavita i ŭ jakim pamiery mahło ažyćciaŭlacca ŭznaharodžańnie hramadzian pry zbory podpisaŭ, nie paznačanaja dakładnaja ci prykładnaja kolkaść hramadzianaŭ, jakija nibyta atrymali adpaviednaje ŭznaharodžańnie. Ja paćviardžaju, što siabry inicyjatyŭnaj hrupy pa zbory podpisaŭ u padtrymku vyłučeńnia Łahvinca A.I. kandydatam u deputaty Pałaty pradstaŭnikoŭ Nacyjanalnaha schodu Respubliki Biełaruś nikoli nie prapanoŭvali i nie pravodzili ŭznaharodžańnie vybarnikaŭ za ŭniasieńnie apošnimi podpisaŭ u padpisnyja arkušy», — piša Łahviniec u skarzie.
Što da razdačy drukavanych materyjałaŭ, to Aleś Łahviniec patłumačyŭ, što na pikietach razdavali jaho vizytoŭki — kab vybarniki mahli patelefanavać kandydatu i zadać svaje pytańni. Jon ličyć, što vizytoŭki nie źjaŭlajucca drukavanymi materyjałami, zabaronienymi da razdačy padčas zboru podpisaŭ:
«Peryjadyčna hramadzianie, jakija jašče dakładna nia vyznačylisia, za jakoha z pretendentaŭ u deputaty jany chacieli b pakinuć svoj podpis, chacieli asabista pahutaryć sa mnoju, kab lepš daviedacca pra maje prafesijnyja i asabistyja jakaści nia tolki jak budučaha kandydata ŭ deputaty, ale i jak pradstaŭnika Pravaabaronča-aśvietnickaha hramadzkaha abjadnańnia «Ruch «Za Cvabodu». Adnak niemahčyma adnamu čałavieku znachodzicca adnačasova na ŭsich pikietach ci abychodzić usie kvatery. Tamu peryjadyčna hramadzianam, jakija chacieli asabista pahutaryć sa mnoju, ale nia mieli, na ich vialiki žal, takoj mahčymaści, pa ich ža prośbie razdavalisia maje asabistyja vizytoŭki z numaram telefona, pa jakim hramadzianie paźniej mahli patelefanavać i asabista pakamunikavać, zadaŭšy pytańni pa samych roznych sferach dziejnaści. Razdača asabistych vizytovak pa prośbach inšych hramadzianaŭ nie źjaŭlajecca parušeńniem Vybarčaha kodeksu Respubliki Biełaruś».
Takim čynam, Aleś Łahviniec prosić Mienskuju haradzkuju vybarčuju kamisiju admianić rašeńnie akruhovaj vybarčaj kamisii Sucharaŭskaj vybarčaj akruhi № 101 ab vyniasieńni papiaredžańnia, a fakty, pakładzienyja ŭ asnovu rašeńnia, — pryznać nie adpaviednymi rečaisnaści.