Biełaruskija i ŭkrainskija pamiežniki spynili niezakonnuju pierapraŭku koniej
U noč na 7 žniŭnia pamiežniki Łuckaha i Pinskaha atradaŭ spynili niezakonnuju pierapraŭku koniej praź biełaruska-ŭkrainskuju miažu.
Apieracyja ŭdałasia dziakujučy apieratyŭnamu abmienu infarmacyjaj, paviedamlaje Dziaržaŭnaja pamiežnaja słužba Ukrainy.
Hrupu nieviadomych, jakija mieli namier viercham na koniach niezakonna pierasiačy miažu, vyjavili biełaruskija pamiežniki. Parušalnikaŭ sprabavali spynić papieradžalnymi strełami, «adnak niepasrednaja blizkaść linii miažy dała mahčymaść pravaparušalnikam źniknuć na terytoryi Ukrainy». Niedaloka ad miesca parušeńnia miažy ŭkrainskija pravaachoŭniki zatrymali dvuch miascovych žycharoŭ biez dakumientaŭ. Jany pryznali svajo dačynieńnie da niezakonnaha pieramiaščeńnia koniej z metaj prodažu. «Zatrymanyja patłumačyli, što paśla strełaŭ spałochanyja koni skinuli vieršnikaŭ i ź pierapudu ŭciakli, a dzie znachodziacca astatnija zmoŭščyki, im nieviadoma».
Zaraz pa abodva baki miažy vyśviatlajecca koła asob, jakija majuć dačynieńnie da pieramiaščeńnia koniej.