Inšaja rečaisnaść u «Padziemcy»
Fotavystava «Inšaja rečaisnaść» prachodzić u Miensku ź 1 červienia.
Fatazdymki Jurja Adzinca — kvadryptychi, jakija adlustroŭvajuć na emacyjnym uzroŭni čałaviečuju prahu («Pryjemnaje», «Zabaronienaje»), abstraktnyja syluetnyja raboty, siarod jakich — kanceptualny tvor «Žyćcio ŭ raskošy», a taksama — seryja «Vieru, što pačniecca biełaja pałasa», jakaja vyjaŭlaje nierazborlivyja frahmenty pryciemkavaha pakoju.
U tematyčnaj seryi «Momanty» Volha Turaviec sprabuje prypynić čas — chutčej, z dapamohaj fantazyi, čym srodkami fota‑vytrymki — nadajučy prabitamu kulaj škłu ci patreskanaj farbie iluzornaść. A ŭ seryi «Supraciŭ bieskarysny» aŭtarka naŭprost pramaŭlaje da hledača z dapamohaj fota‑metafary: šmatlikich sahnutych trubaŭ…
Iryna Kurč pradstaŭlenaja kanceptualnaj seryjaj «7 hrachoŭ» — prosty miech bulby vyjaŭleny ŭ siami roznych stanach, nibyta adpaviadajučy peŭnym stanam śviadomaści: voś miech začynieny, voś —poŭny bulby, a voś jana vysypałasia…
Halina Zakreŭskaja ŭ seryi «pazł» karystajecca frahmentami čałaviečaha cieła, niby kažučy pra frahmentarnaść čałaviečaj asoby, albo ŭjaŭleńniaŭ pra jaje.
A Maksim Panfiłaŭ u seryi «nano» razvažaje pra «nanamastactva», «nanakachańnie» j inšyja nanatechnalohii z dapamohaj lusterkavaj pavierchni j malutkich pacierak.
Usich aŭtaraŭ abjadnoŭvaje sproba razabracca ŭ sabie z dapamohaj fatahrafii j pieradać znojdzieny sens na intuityŭnym uzroŭni praz abstrakcyju.
Na pieršy pozirk, raboty padajucca vielmi prostymi (hetak niekatoryja dzieci, słuchajučy eksperymenty hienija Kołtrejna, kažuć: «ja taksama mahu hetak hrać»), ale padobnyja tvory niemahčymyja biez mastackaha hustu. A pryncypam padobnaj fatahrafii vučacca admysłova.
Źviestki pra studyju «Alma Pater», dzie «inšuju» fatahrafiju vykładajuć za hrošy, možna atrymać na vystavie. «Inšaj» pradstaŭniki studyi «Alma Pater» nazyvajuć fatahrafiju, «jakaja źjaŭlajecca praduktam žyćciadziejnaści čałaviečaje psychiki (nutranoha śvietu) z usimi jaje vyhinami, niečakanymi pavarotami, niedasiažnymi dla razumieńnia kalizyjami j ciažkavylečnymi niedachopami».
Vystava praciahniecca pa 10 červienia ŭ halerei «Padziemka», Miensk, Praspekt Niezaležnaści, 43.