U Biełarusi bolš nie zdasi TOEFL
Pradstaŭnictva Amierykanskaha adukacyjna‑daśledčaha centru ŭ Biełarusi zajaŭlaje pra zakryćcio prahramy testaŭ.
Padrychtavacca pa testach TOEFL, GRE i SAT, papularnych u Biełarusi, možna i ŭ našaj krainie. A voś zdavać ich možna tolki za miežami našaj krainy.
U razmovie ź Jeŭraradyjo pradstaŭnica Centru skazała:
«Ja nie ŭpaŭnavažanaja davać interviju. Ciapier palityčnaja afarboŭka takaja, što nie daje nam navat šancu adradzicca».
Jeŭraradyjo: «Ci praŭda, što vy adzinyja ŭ Biełarusi mieli prava prymać hetyja try testy — TOEFL, GRE i SAT?»
Pradstaŭnica ACER: «Tak, była takaja situacyja, tak».
Jeŭraradyjo: «I ciapier, kab zdać testy, treba vyjechać u susiednija krainy?»
Pradstaŭnica ACER: «U bližejšy čas — tak, ale ACER budzie sprabavać vyrašyć hetuju situacyju ŭ Biełarusi».
***
Čarhovaj achviaraj biełaruska‑amierykanskaj «chałodnaj vojny» stała pradstaŭnictva karparacyi «American Center for Education and Research, Inc.» u Respublicy Biełaruś. Na aficyjnym sajcie pradstaŭnictva źjaviłasia karotkaje paviedamleńnie: «Z 28 traŭnia 2008 hoda pradstaŭnictva karparacyi «American Center for Education and Research, Inc.» u Respublicy Biełaruś spyniaje dziejnaść».
Jak nahadvaje sajt «Biełaruski partyzan», hetaje pradstaŭnictva doŭhija hady akazvała biełaruskim školnikam, studentam, aśpirantam i admysłoŭcam dapamohu ŭ atrymańni adukacyi i stažyroŭkach u Jeŭropie i ZŠA. U minskim i rehijanalnych ofisach pradstaŭnictva možna było biaspłatna skarystacca bahataj biblijatekaj materyjałaŭ dla pastupleńnia ŭ zamiežnyja navučalnyja ŭstanovy i padrychtoŭki da mižnarodnych testaŭ.
Z zakryćciom pradstaŭnictva pad pytańniem apynułasia praviadzieńnie ŭ Biełarusi štohadovych testaŭ arhanizacyi ETS (Educational Testing Service) — TOEFL, GRE i SAT, nieabchodnych dla pastupleńnia va ŭniviersitety va ŭsim śviecie, u tym liku i ŭ niekatoryja rasijskija VNU. Hetyja testy ŭ Biełarusi ładzilisia mienavita supracoŭnikami pradstaŭnictva.