Finlandyja — Biełaruś — 1:1
Nacyjanalnaja zbornaja Biełarusi pa futbole ciaham tydnia praviała druhi tavaryski matč.
Matč abiacaŭsia pakazać telekanał «Ład», ale hledačy, jaki ŭklučyli a 19:00 televizar mahli suzirać tolki alimpijskich zorak našaj krainy minułaha i sučasnaści. Tranślacyja pačałasia tolki na 29‑aj chvilinie hulni, nibyta byli niejkija prablemy na spadarožniku.
2 červienia — nie fiksavanaja FIFA data, tamu kamanda Bernda Štanhie vyjšła na hulniu faktyčna ŭ druhim, kali nia trecim składzie. Z hulcoŭ asnovy možna nazvać tolki Vitala Bułyhu i Vasila Chamutoŭskaha. Inšym hulcam pradstaŭlaŭsia bliskučy šaniec zarekamendavać siabie.
Finy taksama byli pradstaŭlenyja nie macniejšym składam, ale kudy bolš pradstaŭničym, čym biełarusy. Adzin zorka finskaha futbołu Jary Litmanen pravioŭ matčaŭ za nacyjanalnuju kamandu bolš, čym uvieś naš asnoŭny skład razam uziaty.
Hulnia prachodziła nietaropka. Časam łaviŭ siabie na dumcy, što tak mahli b hulać kamandy vyšejšaj lihi čempijanatu Biełarusi. Tolki zredčas sustreča abvastrałasia, ale ŭdałymi dziejańniami varatary advodzili pahrozy ad svaich bramaŭ.
Nivodnaha sapraŭdy stopracentnaha momantu ni adna z kamand stvaryć tak i nie zmahła ŭ asnoŭny čas. Ale ŭžo na pieršaj dadatkovaj chvilinie hulni abaronca žodzinskaha «Tarpeda» Ihar Šytaŭ lepš za ŭsich syhraŭ u štrafnoj na dabivańnie — 1:0. A ŭžo praz adzin abarot sekundnaj strełki Tovi Kalijo lik vyraŭniaŭ — 1:1.
Ničyjnaja seryja našaj zbornaj dasiahnuła troch matčaŭ. Nastupnaja tavaryskuju sustreču kamanda Štanhie praviadzie 20 žniŭnia ŭ Miensku z arhientyncami.