Niezaležnaha žurnalista vinavaciać u niezakonnym apytańni hramadskaj dumki
Staršy ŭčastkovy inśpiektar Łojeŭskaha RAUS Andrej Chičoŭ skłaŭ užo piaty administracyjny pratakoł na homielskaha žurnalista-fryłansiera Kastusia Žukoŭskaha paśla zatrymańnia ŭ rajcentry 21 červienia. Hetym razam pavodle artykułu 9.28 KaAP — niezakonnaje praviadzieńnie apytańnia hramadskaj dumki i raspaŭsiud na telekanale «Biełsat».
Papiarednija try pratakoły — abraza čynoŭnic rajvykankamu, niepadparadkavańnie i abraza pieršaha namieśnika načalnika milicyi Hienadzia Madžary — Łojeŭski rajonny sud adpraviŭ na dapracoŭku. Na padstavie čaćviortaha, składzienaha majoram Chičovym pa artykułu 17.1 KaAP, sudździa Antanina Muzyčenka vyniesła Žukoŭskamu minimalny štraf — try bazavych vieličyni. Štraf hety fryłansier asprečvaje ŭ abłasnym sudzie.
— My pakazali nie tolki harotny stan łojeŭskich pradpryjemstvaŭ, ale i raspaviali, što milicyjanty ŭ Łojevie parušajuć pravy fryłansieraŭ, a taksama miascovych žycharoŭ, zamiest taho, kab ich abaraniać. Praŭdapadobna, ciapier milicejskija načalniki nie mohuć supakoicca — imknucca niejak naškodzić, — ličyć žurnalist.
Zatrymańnie ŭ Łojevie miascovymi milicyjantami homielskich žurnalistaŭ-fryłansieraŭ Kastusia Žukoŭskaha i Alaksieja Atroščanki mieła rozhałas. Kab nie dać zrabić videazdymki kambinata budaŭničych materyjałaŭ, raźbiracca z fryłansierami pryjechali spačatku namieśnica staršyni rajvykankama pa idealohii Natalla Kavurava i kiraŭnica spraŭ Iryna Pastuchova.
Jany vyklikali supracoŭnikaŭ DAI, a paśla da kambinatu prymčaŭ na słužbovaj aŭtamašynie z dvuma aficerami i sam načalnik RAUS Uładzimir Buchaŭcoŭ. Fryłansieraŭ dastavili u rajadździeł milicyi, dzie da Žukoŭskaha biespadstaŭna užyvali hvałt, nanieśli cialesnyja paškodžańni. Z hetaj pryčyny fryłansier napisaŭ zajavu ŭ rajonny adździeł Śledčaha kamitetu, jaki da hetaha času nie zaviaršyŭ pravierku.