Pravacentrysty pravodziać u centry Minska pikiet suprać falsifikacyi vybaraŭ
Pradstaŭniki apazicyjnaj pravacentrysckaj kaalicyi pravodziać 10 vieraśnia kala haścinicy «Minsk» u centry stalicy pikiet suprać falsifikacyi vybaraŭ.
U pravacentrysckuju kaalicyju, nahadajem, uvachodziać Abjadnanaja hramadzianskaja partyja (AHP), ruch «Za Svabodu» i arhkamitet pa stvareńni partyi «Biełaruskaja chryścijanskaja demakratyja» (BCHD).
Jak rastłumačyŭ na pikiecie sustaršynia arhkamiteta pa stvareńni partyi BCHD Vital Rymašeŭski, heta miesca abrana tamu, što jano znachodzicca niedaloka ad płoščy Niezaležnaści i Centrvybarkama. Pavodle jaho słoŭ, na samoj płoščy pravieści pikiet nielha, bo jana ŭvachodzić u pieralik miescaŭ, na jakich nie dapuskajecca praviadzieńnie masavych mierapryjemstvaŭ.
Staršynia AHP Anatol Labiedźka adznačyŭ, što pravacentrysty nie razhladajuć ciapierašniuju vybarčuju kampaniju ŭ parłamient jak demakratyčnuju, ličać vybary nielehitymnymi. Pavodle jaho słoŭ, padobnyja śćviardžeńni možna zrabić na padstavie taho, što bolšaść pradstaŭnikoŭ apazicyi nie byli ŭklučanyja ŭ skład vybarčych kamisij, a prahramy i vystupleńni demakratyčnych kandydataŭ źviedvali cenzuru z boku ŭład. «Hetyja vybary nie mohuć adpaviadać standartam ABSIE», — padkreśliŭ Labiedźka.
Pieršy namieśnik staršyni ruchu «Za Svabodu» adznačyŭ, što naziralniki sabrali sotni faktaŭ, kali vybarčyja kamisii išli na parušeńnie vybarčaha zakanadaŭstva, u tym liku ukidvali biuleteni. «My nie možam ličyć hetyja vybary svabodnymi. Užo zaraz možna śćviardžać, što ŭ parłamient trapiać tolki uchvalenyja ŭładami pretendenty», — adznačyŭ palityk.
U pikiecie prymajuć udzieł da dvaccaci čałaviek, u tym liku kandydaty ŭ deputaty Juraś Hubarevič, Juryj Chaščavacki, Volha Kavalkova, Alina Chomič, Dźmitryj Kučuk, Volha Majorava i inšyja.
Za pikietam nazirajuć supracoŭniki milicyi ŭ cyvilnym, zdymajučy toje, što adbyvajecca, na kamieru.