Stratfor: Niestabilnaść u Centralnaj Azii moža adciahnuć uvahu Maskvy ad Uschodniaj Jeŭropy
Padziei ŭ Centralnaj Azii, jakija mohuć pačacca paśla naturalnaha sychodu pakaleńnia postsavieckich aŭtarytarnych lidaraŭ, mohuć stvaryć maštabnyja prablemy dla Rasii na jaje paŭdniovym fłanzie, havorycca ŭ analityčnaj zapiscy Stratfor.
Rehijon byŭ amal «zamarožany» pad uładaj takich prezidentaŭ jak Karymaŭ, Nazarbajeŭ, Rachmon, adnak staraść i śmierć lidaraŭ, etnična-kłanavyja kanflikty, rost nasielnictva pry padzieńni ŭzroŭnia žyćcia i pastupleńniaŭ ad hastarbajteraŭ u Rasii, mohuć pryvieści da vybuchu ŭ postsavieckich cetralnaazijackich respublikach.
U vypadku rezkaha paharšeńnia situacyi ŭ rehijonie Rasija, jakaja ŭžo viadzie dźvie vajny - u Siryi i Ukrainie - budzie vymušanaja pieranakiravać značnyja vajskovyja kantynhienty, kab chacia b prosta kantralavać svaje paŭdniovyja miežy.
Ekanamičnaja recesija i finansavyja prablemy, jakija ŭžo pastupova źmianšajuć vydatki Rasii na vajennyja mety, mohuć prymusić Maskvu prosta admovicca ad aktyŭnaj roli ŭ rehijonie - pieradać rol lidara tut Kitaju, ličyć analityk Rodžer Bejkier.
U toj ža čas małavierahodna, kab dla stabilizacyi Centralnaj Azii Vašynhton nakiravaŭ siudy svaje vojski.
«Palityčnyja składanaści snabžeńnia vojsk naziemnym šlacham praź inšyja krainy, łahistyčnyja prablemy pry pastaŭkach ciažkich hruzaŭ pavietranym šlacham dadajucca pra niazručnaści transpartyroŭki vojsk na takuju adlehłaść, jak užo pakazała vajna ŭ Afhanistanie», - havorycca ŭ artykule.
Adpaviedna dla strymlivańnia kanfliktaŭ i isłamskaha ekstremizmu ŭ Centralnaj Azii zastajucca tolki Rasija i Kitaj - im prydziecca adnačasova šukać kampramis i nakiroŭvać ź inšych važnych nakirunkaŭ resursy i vojski.