Źmicier Daškievič abviaściŭ pra zbor podpisaŭ salidarnaści z Eduardam Palčysam
Pra heta lidar Maładoha Frontu napisaŭ u Fejsbuku.
«Praciahvajecca zbor podpisaŭ za bieł-čyrvona-bieły ściah (elektronnaja pietycyja tut), ale ź siońniašniaha dnia na kožnym pikiecie pačynajecca zbor podpisaŭ pad artykułam Džona Silviera «5 pryčyn, pa jakich Ukraina pieramoža RF». Dadzieny artykuł, tłumačyć Daškievič, adzin ź dzieviaci, jakija sud pryznaŭ ekstremisckimi, što i inkryminujecca Eduardu Palčysu ŭ vinu. «My abrali hety artykuł dla padpisańnia, bo, pa-pieršaje, jon samy łakaničny, a pa-druhoje, mienavita za supraćstajańnie rasiejskaj ahresii va Ukrainie Eduard Palčys i byŭ zavableny ŭ Rasieju i tam aryštavany», — piša jon.
Planujecca, što zaŭtra, pierad pačatkam suda advakat Eduarda budzie chadajničać dałučyć padpisany inšymi ludźmi artykuł «5 pryčyn…» da materyjałaŭ kryminalnaj spravy.
13 kastryčnika ŭ Minsku staić piać pikietaŭ, na jakich možna pastavić svoj podpis za #našściah i adnačasna pad artykułam Džona Silviera «5 pryčyn, pa jakich Ukrajina pieramoža RF».
1. Vychad ź mietro Kupałaŭskaja/Kastryčnickaja ŭ bok univiersama «Centralny» (z 14:00 da 21:00).
2. Vychad ź mietro pł. Jakuba Kołasa ŭ bok Kamaroŭskaha rynka (z 14:00 da 20:00).
3. Vychad ź mietro pł. Niezaležnaści ŭ bok vakzała i st. Družnaja (z 14:00 da 20:00).
4. Vychad ź mietro Instytut Kultury ŭ bok doma byta i čyhunačnaj stancyi (z 15:00 da 20:00).
5. Vychad ź mietro Kamiennaja horka ŭ bok kramy «Maciaryk» (z 17:00 da 21:00).
* * *
14 kastryčnika Minski haradski sud pačnie razhladać kryminalnuju spravu aŭtara sajta 1863x.com. Eduarda Palčysa vinavaciać u raspalvańni varožaści pa prykmiecie rasavaj, nacyjanalnaj, relihijnaj, moŭnaj ci inšaj sacyjalnaj prynaležnaści (č. 1 art. 130 KK), a taksama ŭ vyrabie i raspaŭsiudzie parnahrafičnych materyjałaŭ (art. 343 KK).
Palčys byŭ zatrymany ŭ Rasii, potym pieradadzieny ŭ Biełaruś, i ŭžo 9 miesiacaŭ, kolki išło śledstva, znachodzicca za kratami. Pravaabaroncy pryznali Eduarda Palčysa palitźniavolenym.