Biełaruś i ES padpisali pahadnieńnie ab partniorstvie ŭ śfiery mabilnaści
Biełaruś i Jeŭrasajuz padpisali pahadnieńnie ab partniorstvie ŭ śfiery mabilnaści. Sumiesnaja dekłaracyja, jakaja vyznačaje asnovu budučaha supracoŭnictva ŭ śfiery mihracyi i mabilnaści, padpisanaja 13 kastryčnika ŭ Luksiemburhu ŭ ramkach sustrečy Savieta pa justycyi i ŭnutranych spravach ES.
Dakumient padpisali jeŭrakamisar pa pytańniach mihracyi, unutranych spraŭ i hramadzianstva Dzimitrys Aŭramopułas, ministr unutranych spraŭ Biełarusi Ihar Šunievič, a taksama ministry, adkaznyja za pytańni mihracyi ŭ siami krainach ES, jakija ŭdzielničajuć u prajekcie «Partniorstva dla mabilnaści» (Bałharyja, Rumynija, Polšča, Vienhryja, Finlandyja, Łatvija i Litva), paviedamlaje pres-słužba Savieta ES.
«Zapusk «Partniorstva dla mabilnaści» — važny krok na šlachu da ŭmacavańnia supracoŭnictva Jeŭrapiejskaha sajuza i Biełarusi ŭ śfiery mihracyi, pradastaŭleńnia prystanišča i kiravańnia miežami. Kali ES choča paśpiachova adkazvać na vykliki, źviazanyja ź mihracyjaj, nam taksama naležyć aktyvizavać supracoŭnictva z važnymi krainami-susiedziami, takimi jak Biełaruś», — skazaŭ jeŭrakamisar Aŭramopułas.
Ministr unutranych spraŭ Słavackaj Respubliki Robiert Kaliniak adznačyŭ, što «Partniorstva dla mabilnaści» paspryjaje supracoŭnictvu ekśpiertaŭ pa mihracyi, prystaniščy i kiravańni miežami i ŭniasie svoj układ u dalejšaje ŭmacavańnie adnosin bakoŭ u śfiery ŭnutranych spraŭ. «Heta dobry krok napierad u našych adnosinach, bo jano zblizić hramadzian Biełarusi i ES», — padkreśliŭ jon.
«Partniorstva dla mabilnaści» pamiž ES i Biełaruśsiu ŭstanaŭlivaje šerah palityčnych zadač, a taksama vyznačaje haliny dalejšaha dyjałohu i supracoŭnictva ES ź Biełaruśsiu z metaj zabiaśpiečyć jak maha bolš efiektyŭnaje kiravańnie mihracyjnymi patokami.
«Biełaruś niaźmienna demanstruje namahańni pa efiektyŭnym kiravańni miežami i supraćdziejańni transhraničnym sietkam, jakija ŭdzielničajuć u handli ludźmi i kantrabandzie mihrantaŭ, — havorycca ŭ paviedamleńni pres-słužby. — U ramkach «Partniorstva dla mabilnaści» buduć pryniaty miery dla ŭmacavańnia supracoŭnictva ŭ śfierach zakonnaj i pracoŭnaj mihracyi, pradastaŭleńnia prystanišča i abarony biežancaŭ, u śfiery prafiłaktyki i procidziejańnia nierehularnaj mihracyi, u tym liku kantrabandzie mihrantaŭ i handlu ludźmi, a taksama dla maksimizacyi stanoŭčaha ŭpłyvu mihracyi i mabilnaści».
Jak adznačajecca ŭ paviedamleńni, Biełaruś i ES zaviaršyli pieramovy pa tekście pahadnieńnia 1 červienia 2015 hoda. Na siońniašni dzień takija pahadnieńni ŭ ES užo dziejničajuć z Małdovaj (2008), Kaba-Vierde (2008), Hruzijaj (2009), Armienijaj (2011), Azierbajdžanam (2013 hoda), Maroka (2013), Tunisam (2014) i Iardanijaj (2014 ).
«Partniorstvy dla mabilnaści» dajuć hibkija ramki, jakija nie majuć abaviazkovaj jurydyčnaj siły, dla taho, kab kiravańnie pieramiaščeńniem ludziej pamiž ES i treciaj krainaj mahło ažyćciaŭlacca efiektyŭna.
Naroŭni z damovami ab spraščeńni vizavaha režymu i readmisii, pieramovy pa jakich usio jašče praciahvajucca, «Partniorstva dla mabilnaści» budzie klučavym instrumientam raźvićcia supracoŭnictva ES i Biełarusi ŭ śfiery mihracyi i pašyreńnia mabilnaści hramadzian ES i Biełarusi ŭ dobra kiravanych i biaśpiečnych umovach.
U 2015 hodzie kolkaść padadzienych u Biełarusi chadajnictvaŭ ab vydačy šenhienskich viz dasiahnuła 752 tysiač 782. Najbolšuju kolkaść chadajnictvaŭ atrymlivajuć Polšča i Litva. Mienš chadajnictvaŭ atrymlivajuć Łatvija, Hiermanija, Italija i Estonija. Biełaruś — kraina z najbolšaj u śviecie kolkaściu vydadzienych šenhienskich viz na dušu nasielnictva i adna ich krain z najmienšym pracentam admovy ŭ vizach, padkreślivajecca ŭ paviedamleńni.
Pavodle dadzienych Jeŭrastata ab dazvołach na žycharstva, u 2015 hodzie 140 tysiač 962 hramadzianiny Biełarusi pražyvali ŭ ES. Bolšaść ź ich pražyvali ŭ Polščy (80.889), Hiermanii (18.140), Italii (9.094), Litvie (6.188) i Češskaj Respublicy (4.964).