Novy hienpłan Minska: 50 tysiač minčukoŭ majuć pierasialić u harady-spadarožniki
Novy hienpłan Minska apublikavany na sajcie Minharvykankama.
U poŭnym pamiery hienpłan možna pahladzieć TUT.
Niekatoryja niuansy raźvićcia stalicy byli viadomyja jašče da publikacyi. Ciapier ža kožny haradžanin moža vyvučyć jaho bolš padrabiazna.
Nahadajem, prajekty raźvićcia kankretnych rajonaŭ abo mikrarajonaŭ buduć prezientavacca asobna ad hienpłana. Ahulny płan raźvićcia ŭsiaho horada zvyčajna ŭklučaje ŭ siabie tolki ahulnyja pytańni: jak budzie raźvivacca žyllovaja palityka, dzie i kolki buduć budavać, jakija terytoryi płanujecca asvojvać.
Naprykład, zhodna z hienpłanam, dla taho kab vyklučyć u Minsku praźmiernuju kancentracyju nasielnictva, jaho treba raśsialać u harady-spadarožniki Rudziensk, Smalavičy, Zasłaŭje, Dziaržynsk, Fanipal i Łahojsk. U ich kolkaść nasielnictva płanujuć pavialičyć: u Rudziensku — da 81 tys. čałaviek (+70 tys. čał.), u Dziaržynsku — 41 tys. čałaviek (+18 tys. čał.), U Smalavičach — da 30 tys. čałaviek (+14, 5 tys. čał.), u Zasłaŭi — da 23,5 tys. čałaviek (+9 tys. čał.), u Fanipali — da 23 tys. čałaviek (+9 tys. čał) i ŭ Łahojsku — da 19 tys. čałaviek (+7 tys. čał.). Usiaho ŭ harady-spadarožniki pavinny pierajechać bolš za 120 tysiač čałaviek, ź ich, jak miarkujuć ułady, 50 tysiač — heta minčuki, jakija majuć patrebu ŭ palapšeńni žyllovych umoŭ, i da 70 tys. patencyjalnych mihrantaŭ ź inšych rehijonaŭ respubliki, jakija ŭ inšych umovach mahli b pierasialicca ŭ Minsk na stałaje žycharstva.
U Minsku ž kolkaść žycharoŭ pavinna pavialičycca tolki na 50 tysiač čałaviek da 2020 hoda, a da 2030 ŭ stalicy pavinna pražyvać 2 miljony čałaviek. Ahulnaja płošča terytoryi horada pavinna vyraści na 4 tysiačy hiektaraŭ. Bolš padrabiazna asnoŭnyja technika-ekanamičnyja pakazčyki hienpłana možna pahladzieć TUT, TUT i TUT.
Adna z hałoŭnych zadač, jakuju pastavili sabie horadabudaŭniki, — zabieśpiačeńnie ŭsich siemjaŭ indyvidualnym žyllom — kvaterami ci damami. Dla vyrašeńnia hetaj prablemy płošča žyłoha fondu ŭ administracyjnych miežach pavinna pavialičycca da 45,3 młn kv. m da 2021 hoda i 52,3 młn kv. mietraŭ da 2031 hodzie. Zabiaśpiečanaść ahulnaj žyłoj płoščaj u raźliku na adnaho žychara da raźlikovaha terminu składzie bolš za 26 kv. mietraŭ.
Pa ŭsich mikrarajonach stalicy buduć składzienyja asobnyja płany detalovaha płanavańnia.
Pra siadzibnaj zabudovie, jakuju minčanie tak zaŭziata adstojvajuć amal dva hady, u hienpłanie skazana nastupnaje: płanujecca pravieści rekanstrukcyju rajonaŭ isnujučaj siadzibnaj zabudovy sa znosam siadzibnaha fondu ŭ centralnaj zonie horada i vybaračnym znosam u siaredniaj zonie z raźmiaščeńniem vysokaščylnaj šmatkvaternaj zabudovy, što daść mahčymaść sfarmavać zabudovu važnych haradskich mahistralaŭ (vuł. Arłoŭskaja, Bahdanoviča, Vałhahradskaja, Bresckaja, Staletava) i atrymać dadatkovyja abjomy žylla (byłyja vioski Sucharava, Družba, Piatroŭščyna, Kuncaŭščyna, Dražnia, Karziuki).
I pa hetych, i pa astatnich pryvatnych siektarach rašeńnie buduć prymać asobnymi płanami detalovaha płanavańnia.
Dzie buduć budavać i kaho — uščylniać?
Budavać žyllo buduć na tych terytoryjach, jakija zareziervavali raniej: u Kamiennaj Horcy, Dambroŭcy, Brylevičach, budzie praciahvacca zasvajeńnie rajonaŭ Michałova, Labiažy, Łošyca, «Vialiki Les», «Majak Minska».
Jak paviedamlaje sajt Minharvykankama, płanujecca budaŭnictva asobnych žyllovych kompleksaŭ i damoŭ, žyłych hrup i kvartałaŭ na svabodnych terytoryjach i ŭ rekanstrujavanych mikrarajonach (žyły kvartał Parka vysokich technałohij, Mahistr, Maskoŭski kvartał, studenckaja vioska pa prasp. Dziaržynskaha, Vietraź, Akvamaryn i inš.). Rekanstrukcyja rajonaŭ isnujučaj siaredniepaviarchovaj žyłoj zabudovy 60-70-ch hadoŭ budaŭnictva (Załataja Horka, rajon Čkałava i bulvara Šaŭčenki), a taksama asobnych terytoryj sa znosam małapaviarchovych šmatkvaternych žyłych damoŭ u rajonie pasiołkaŭ viełazavoda, aŭtazavoda i traktarnaha zavoda, vulic Navavilenskaj, Hasteły, K. Čornaha, R. Luksiemburh i inš.)
«Notynhiem» taksama płanujuć usio ž pačać budavać.
Histaryčny centr horada, jak i płanavałasia, praciahnuć rekanstrujavać: Rakaŭskaje pradmieście, vulicy Vierchniaha horada i kvartałach Trajeckaha pradmieścia. Praciahnucca pracy pa ŭznaŭleńni Mienskaha zamčyšča, z rekanstrukcyjaj učastkaŭ zabudovy vuł. Niamiha i prasp. Pieramožcaŭ.
Hienpłan Minska ŭžo možna pahladzieć na sajcie Minharvykankama. U razdrukavanym vyhladzie jaho taksama płanujuć prezientavać, ale dzie i kali, pakul nieviadoma.
— Pytańnie raźmiaščeńnia ekspazicyi ŭ hramadskim miescy ciapier prapracoŭvajecca, — rastłumačyli ŭ pres-słužbie Minharvykankama.
Cikavaść minčan da płanaŭ uładaŭ pa raźvićci stalicy, biassprečna, jość. Kali letaś hienpłan vystavili na hramadskaje abmierkavańnie, haradskija aktyvisty navat stvaryli kampaniju «Hienpłan — dla minčan», jakaja dapamahała adstojvać pravy tych, čyje damy, zhodna z płanam, išli pad znos. Akramia taho, aktyŭnyja žychary mikrarajonaŭ stali abjadnoŭvacca ŭ inicyjatyŭnyja hrupy, kab razam zmahacca z uščylnieńniem. Chutčej za ŭsio, adkarektavany hienpłan taksama nie pakinie haradžan abyjakavymi.