Zymbabvijskaja apazycyja budzie bajkatavać druhi tur vybaraŭ
Heta aznačaje, što hałasavańnie aŭtamatyčna padoŭžyć 30-hadovaje panavańnie Muhabe.
Morhan Cvanhiraj admoviŭsia ad udziełu ŭ druhim tury prezydenckich vybaraŭ. Ź jahonych słovaŭ, šancaŭ na svabodny i spraviadlivy padlik hałasoŭ bolš nie zastałosia. Režym prezydenta Roberta Muhabe razharnuŭ kampaniju teroru paśla taho jak prajhraŭ ź vialikim adryvam pieršy tur hałasavańnia. Muhabe zajaviŭ, što nie addaść ułady «prysłužnikam kalanizataraŭ» navat kali jany nabiaruć bolšaść hałasoŭ. «My nie dla taho vajavali za niezaležnaść», - skazaŭ jon. «Chiba ručka macniejšaja za aŭtamat? My nie damo znoŭ zaniavolić našu krainu tolki tamu što niechta pastaviŭ kryžyk nia suprać taho proźvišča».
Ułady zamianili ŭ viaskovych vybarčych kamisijach nastaŭnikaŭ na palicyjantaŭ. Tym časam veterany vajny za niezaležnaść i tamtejšyja eresemaŭcy raspačali kursy «paskoranaha pieravychavańnia», u vyniku čaho 65 čałaviek zahinuli, niekatoryja ź ich byli spaleny žyŭcom. Niekalki dziasiatkaŭ tysiač čałaviek uciakli z krainy. Cvanhiraj paličyŭ, što dalejšy ŭdzieł u vybarach u takich umovach nia maje sensu. Adnak heta aznačaje, što vybary padoŭžać 30-hadovaje panavańnie Muhabe.
Cvanhiraj nia ŭdzielničaŭ u vajnie za niezaležnaść. Jon pačaŭ palityčnuju karjeru jak dziajač prafsajuzaŭ.