Brytanskuju paru abvinavacili ŭ hamafobii i admovili va ŭsynaŭleńni
Brytanskaja siamja, jakoj z-za jaje niehatyŭnych pohladaŭ na vychavańnie dziaciej u adnapołych siemjach było admoŭlena va ŭsynaŭleńni dvaich dziaciej, zajaviła ab parušeńni jaje prava na svabodu słova. Pra heta piša VVS.
Muž i žonka atrymali admovu va ŭsynaŭleńni, paśla taho jak zajavili, što «dziciaci patrebnyja maci i baćka».
Siamja padała apielacyju suprać hetaha rašeńnia, zajaviŭšy, što jano nie adlustroŭvaje intaresy dziaciej. U aŭtorak pavinien adbycca razhlad hetaj spravy ŭ saviecie pa ŭsynaŭleńni.
U pačatku hoda dzieci byli časova pieradadzienyja na vychavańnie ŭ patranatnuju siamju. Muž i žonka — pierakananyja chryścijanie — viedali, što ŭłady šukajuć dzieciam pryjomnych baćkoŭ. Ale kali stała viadoma, što patencyjnyja ŭsynavicieli — adnapołaja para, patranatnyja vychavalniki vyrašyli sami ŭsynavić dziaciej.
«My nie mahli sabie ŭjavić, što pra dziaciej buduć kłapacicca dvoje mužčyn», — zajaviła žančyna, jakaja prahnie stać pryjomnaj maci.
«Chłopčyk heta ci dziaŭčynka, ale dzicia šukaje madel pavodzinaŭ. Dla nas najlepšaja madel siamji — heta matula i tata. Adnapołaja para — mahčyma, miłaja, jany chočuć stać baćkami, u ich moža być bolš hrošaj, ale ja adčuvaju, što nas uščamlajuć u pravach z-za našaj relihijnaści», — dadała jana.
Pa słovach žančyny, saviet pa ŭsynaŭleńni byŭ nakiravany na toje, kab zadavolić chadajnictva adnapołaj pary, «zabyvajučy pra dabrabyt dziaciej».
Muž i žonka, jakija nie ličać siabie hamafobami, dadali, što saviet pa ŭsynaŭleńni z samaha pačatku viedaŭ ab ich relihijnaści.
U 2014-2015 hodzie adnapołyja pary ŭsynavili 450 dziaciej u Anhlii, 30 — va Uelsie i 22 — u Šatłandyi.