Tramp prosić dać svaim dzieciam dostup da zvyšsakretnaj infarmacyi
Abrany na minułym tydni prezident ZŠA Donald Tramp źviarnuŭsia da Biełaha Doma z pytańniem pra nadańnie svaim dzieciam dazvołu na dostup da sakretnaj infarmacyi samaha vysokaha ŭzroŭniu, paviedamiŭ sajt CBS News.
Dzieci Trampa — dačka Ivanka, syny Eryk i Donald — byli važnymi ŭdzielnikami i raspracoŭščykami vybarčaj kampanii svajho baćki, a taksama stali častkaj kamandy, jakaja zajmajecca pryjomam spraŭ ad dziejnaj prezidenckaj administracyi, piša Reuters.
Eryk Tramp, Donald Tramp-małodšy, Ivanka Tramp, Donald Tramp. Fota Reuters
Dzieci prezidenta pavodle zakonu nie mohuć być supracoŭnikami Biełaha doma, adnak jany mohuć ličycca daradcami pa tym ci inšym pytańni. Kab atrymać taki dazvoł, treba zapoŭnić śpiecyjalnuju ankietu i prajści adpaviednuju pravierku.
Raniej syny i dačka Donalda Trampa ŭžo kazali, što nie buduć zajmać aficyjnych pastoŭ va ŭradzie.
«Ja źbirajusia być prosta dačkoj. Adnak padčas vybarčaj kampanii ja kazała, što vielmi zakłapočanaja peŭnymi prablemami, i što chaču ich vyrašyć», — skazała, naprykład, Ivanka Tramp u efiry CBS News.
Mieniedžarka kampanii Trampa Kielien Konuej paviedamiła ŚMI, što jana nie maje niepasrednaj infarmacyi pra zapyty adnosna dostupu da sakretnaj infarmacyi, adnak, kali takija byli, to jany, imavierna, byli niefarmalnymi.