Zakon ab arhaničnym ziemlarobstvie moža zapracavać uvosień 2017 hoda
Zakon ab arhaničnym ziemlarobstvie moža zapracavać u Biełarusi ŭžo ŭ 2017 hodzie, zajaviŭ ministr sielskaj haspadarki i charčavańnia Leanid Zajac 15 listapada na pres-kanfierencyi ŭ Minsku.
Na jaho dumku, zakon moža nabyć moc u listapadzie nastupnaha hoda. Pry hetym jon adznačyŭ nieabchodnaść «vyznačyć, što takoje arhaničnaja pradukcyja: małako, miasa abo pradukcyja ziemlarobstva, pastavić tyja ramki, jakija nieabchodnyja dla arhaničnaha ziemlarobstva, raspracavać techrehłamienty i zabiaśpiečyć takim vytvorcam dziaržaŭnuju padtrymku».
Jon padkreśliŭ, što va ŭsim śviecie arhaničny pradukt cenicca i maje vysoki košt. Jaho vyroščvańnie i atrymańnie praduhledžvaje nieprymianieńnie minieralnych uhnajeńniaŭ, hierbicydaŭ, piestycydaŭ, a tolki arhaničnych uhnajeńniaŭ. «Heta toje, što daje matuchna-ziamla», — adznačyŭ kiraŭnik viedamstva.
Ministr pryvioŭ prykład, kali ŭ kancy 1960-ch hadoŭ u Biełarusi źbirałasia 8 centnieraŭ z hiektara zbožžavych. «Z takoj uradžajnaściu chiba možna prakarmić siońnia naš narod? Nie, viadoma. I my sa svaim hieahrafičnym stanoviščam znachodzimsia ŭ krychu horšych klimatyčnych umovach ziemlarobstva, čym Francyja ci Hiermanija. Tam mienš chvarob. U Biełarusi, kab atrymać uradžaj, treba vielmi surjozna abaraniać našy pasievy ad škodnikaŭ i chvarob», — padkreśliŭ Zajac. Jon paviedamiŭ, što biez abarony raśliny nazapašvajuć mikataksiny, jakija pa svaim uździejańni na arhanizm čałavieka bolš škodnyja, čym piestycydy i chimikaty. Razam z tym u biełaruskaj pradukcyi niama pieravyšeńnia norm chimikataŭ, zapeŭniŭ ministr. «Technałahičny dohlad za raślinami spryjaje tamu, kab zabiaśpiečyć krainu i ekspart naturalnym praduktam biez utrymańnia jadachimikataŭ, nitrataŭ, nitrytaŭ», — skazaŭ ministr.
«Ziemlarobstva ŭ asnovie svajoj pavinna być ekałahična intensiŭnym, nie parušajučy pryrodu, zabiaśpiečvać jakaść pradukcyi biez prymianieńnia jadachimikataŭ, piestycydaŭ, nitrataŭ i inšych», — skazaŭ Zajac.