Litva pačynaje kampaniju baraćby z ałkaholem
Dla hetaha daviadziecca navat unieści źmieny ŭ Kanstytucyju.
U prajekcie prahramy Litoŭskaha sajuza sialan i zialonych (ŁSKZ) i sacyjał-demakrataŭ rasstaŭlenyja akcenty ŭ baraćbie z ałkahalizmam. Nie admovilisia ad dziaržaŭnaj manapolii, akramia taho, akcentujecca zabarona na rekłamu i pavyšeńnie akcyza.
«Budziem źnižać dastupnaść ałkaholu. Z hetaj metaj praduhledžvajem dziaržaŭnuju manapolnuju sietku, jakaja zojmiecca handlem ałkaholem, akramia taho, mocny ałkahol možna budzie kuplać tolki z 20 hadoŭ, budzie abmiežavany načny handal ałkaholem, skarocicca kolkaść miescaŭ prodažu ałkaholu.
Budziem rabić bolš žorstkimi adkaznaść za nievykanańnie paradku handlu ałkaholem, za paŭtornaje parušeńnie, źviazanaje z prodažam ałkaholu na vynas va ŭstanovach hramadskaha charčavańnia, buduć pazbaŭlać licenzii», — skazana ŭ prajekcie.
Akramia taho, novy ŭrad płanuje pavyšać akcyz na ałkahol.
Da ŭviadzieńnia dziaržaŭnaj manapolii, u adpaviednaści z prahramaj, buduć inšyja abmiežavańni. «U pierachodny pieryjad budzie bolš žorstkim paradak vydačy licenzij na prodaž ałkaholu i źmieniacca akcyzy na ałkahol i tytuniovyja vyraby.
Akramia taho, budzie całkam zabaronienaja rekłama ałkaholu i tytuniovych vyrabaŭ. Za košt srodkaŭ, atrymanych paśla padvyšeńnia akcyza, buduć vypuskać sacyjalnuju rekłamu, inšymi sposabami adukoŭvać hramadstva.
U prahramie adznačajecca, što budzie bolš žorstkaj baraćba ź nielehalnym ałkaholem i tytuniovymi vyrabami. Budzie bolš žorstkaj adkaznaść za prodaž ałkaholu i tytuniovych vyrabaŭ niepaŭnaletnim ludziam.
Ale zahvazdka ŭ tym, što dla ŭviadzieńnia dziaržaŭnaj manapolii na prodaž ałkaholu daviadziecca mianiać Kanstytucyju Litvy.