Mark Cukierbierh nazvaŭ miery baraćby z falšyvymi navinami ŭ fejsbuku
Facebook raspracoŭvaje sposaby baraćby z dezinfarmacyjaj ŭ sacyjalnaj sietcy, napisaŭ na svajoj staroncy ŭ fejsbuku stvaralnik sacyjalnaj sietki Mark Cukierbierh.
Kampanija surjozna stavicca da dezinfarmacyi ŭ fejsbuku i abmiažoŭvaje vydaču takoha kantentu. Toje ž adnosicca da spamu i «klikbejtnych» zahałoŭkaŭ, cytuje Cukierbierha «Doždž». Pierad kampanijaj stajać jak techničnyja, tak i fiłasofskija prablemy, praciahvaje Cukierbierh.
«My nie chočam sami vystupać sudździami, a addajem pieravahu spadziavańniam na naša hramadstva i treciaje mierkavańnie», — tłumačyć jon. Facebook pavinien być aściarožnym, kab nie abmiažoŭvać abmien mierkavańniaŭ ci pamyłkova abmiažoŭvać praŭdzivyja paviedamleńni, piša Cukierbierh.
U papiarednim svaim paviedamleńni stvaralnik sietki pisaŭ, što na niepravieranyja i falšyvyja naviny prychodzicca 1% ad usiaho kantentu sacyjalnaj sietki. «Adnak, choć pracent dezinfarmacyi adnosna nievialiki, u nas napieradzie šmat pracy», — piša jon.
Cukierbierh pieraličyŭ asnoŭnyja kroki, jakija kampanija raspačnie, kab vyrašyć prablemu dezinfarmacyi.
Karystalniki zmohuć paviedamlać pra iłžyvyja naviny, i zrabić heta budzie značna praściej. Pakul što dla hetaha nieabchodna pisać śpiecyjalny zapyt. Tyja paviedamleńni, na jakija karystalniki buduć skardzicca, sacyjalnaja sietka stanie paznačać jak sumniŭnyja.
Kampanija taksama nadaść bolš uvahi «rekamiendavanym artykułam», jakija sacsietka aŭtamatyčny prapanuje karystalnikam na asnovie ich davieru. Jašče adna miera — finansavaje abmiežavańnie staronak, što raspaŭsiudžvajuć spam, piša Cukierbierh.
Ciaham niekalkich tydniaŭ, stvaralnik Facebook byŭ vymušany adkazvać na abvinavačvańni, maŭlaŭ, falšyvyja naviny ŭ fejsbuku u tym liku zabiaśpiečyli pieramohu Donalda Trampa na prezidenckich vybarach. Cukierbierh nazvaŭ heta «varjackaj idejaj».