U Manholii armianski scenar
Pratesty apazycyi pieraraśli ŭ pahromy. Prezydent krainy ŭvioŭ nadzvyčajnaje stanovišča.
Prezydent Manholii Nambaryn Enchbajar abviaściŭ pra ŭviadzieńnie na čatyry dni nadzvyčajnaha stanovišča.
Unačy ŭ stalicu krainy Ułan‑Batar byli ŭviedzienyja ŭnutranyja vojski, zatrymana kala 500 čałaviek, jakija brali ŭdzieł u masavych biesparadkach. Zahinuli čatyry čałavieki, vialikaja kolkaść paranienych.
Padčas chvalavańniaŭ byli paranienyja bolš za sto palicejskich, tryccać ź ich znachodzicca ŭ balnicy. Paciarpieli niekalki pradstaŭnikoŭ ŚMI. Najbolš surjozna paciarpieŭ žurnalist ź Japonii, jaki ciapier u reanimacyi.
Na dadzieny momant začynieny centar Ułan‑Bataru, h.zv. «małoje koła», u jakim znachodziacca ŭradavyja budynki, hałoŭnaja płošča stalicy, meryja, šerah dziaržaŭnych ustanoŭ. Darohi pierakrytyja palicejskimi aŭtamabilami.
U vyniku masavych chvalavańniaŭ 1 lipienia byŭ mocna paškodžany budynak kirujučaj ciapier u krainie Manholskaj narodna‑revalucyjnaj partyi i štab-kvatera prezydenta, zhareła karcinnaja halereja, byŭ razhromleny Centralny dom kultury, źniščany stroi i instrumenty unikalnaha ansamblu narodnych instrumentaŭ.
Da šostaj ranicy pažary byli patušanyja.
Nahadajem, što chvalavańni ŭ horadzie pačalisia paśla zajavy najbujniejšaj apazycyjnaj siły – Demakratyčnaj partyi – pra falsifikacyju vynikaŭ parlamenckich vybaraŭ, što prajšli ŭ minułuju niadzielu. Na ich, pavodle aficyjnych vynikaŭ, pieramahła kiraŭničaja Manholskaja narodna-revalucyjnaja partyja, zabraŭšy minimum 44 mandaty z 76. Demakratyčnaja partyja atrymała 26 mandataŭ. Apazycyja nie pahadziłasia z vynikami vybaraŭ i ŭhołas abviaściła pra ich falsifikacyju.
Pa padobnym scenary raniej razhortvalisia padziei ŭ Armienii, dzie taksama trymajecca režym, jaki karystajecca padtrymkaj Maskvy.
* * *
Premjer‑ministar krainy Sanžyjan Bajar źvinavaciŭ va ŭsim lidera demakrataŭ.
«Cachiahijn Ełbehorž zrabiŭ vielmi biezadkaznuju zajavu, denansavaŭšy vyniki vybaraŭ, pry tym, što aficyjnyja vyniki jašče nie abvieščany».
Pradstaŭniki tamtejšaha Centarvybarkamu nastojvajuć na svaich źviestkach i kažuć, što pracavali ŭ adpaviednaści z ŭ zakanadaŭstvam. Ale pradstaŭniki partyi «Hramadzianski ruch» ŭžo zaklikali da pierapadliku biuleteniaŭ na niekatorych učastkach Ułan‑Bataru.
«Manholski narod prahałasavaŭ za demakratyju, a nie MNRP, ‑‑ jakija byłyja kamunisty», ‑‑ cytuje słovy vice‑staršyni Ruchu O. Manhaja Bi‑Bi‑Si.
Manholija apošnim časam sprabuje madernizavać svaju ekanomiku, zasnavanuju ŭ asnoŭnym na kačavoj sielskaj haspadarcy. Pa źviestkach uradu, siaredniedušavy dachod u krainie składaje u siarednim 1,5 tys. dalaraŭ ZŠA ŭ hod.
Dźvie najbujniejšyja palityčnyja partyi Manholii napiaredałdni vybaraŭ vykazvali svajo bačańnie taho, jak raźmierkavać niadaŭna znojdzienyja ŭ krainie vielizarnyja zapasy karysnych vykapniaŭ: u tym liku miedzi, zołata i vuhalu, padkreślivaje Bi-Bi-Si.