«Kryž Eŭfrasińni Połackaj» — manieta hodu
Pamiatnyja maniety biełaruskaha Nacyjanalnaha banku ŭziali šerah uznaharodaŭ na Mižnarodnym konkursie «Manietnaje suzorje — 2008».
U naminacyi «Manieta hoda» pieramahła pamiatnaja manieta «Kryž Eŭfrasińni Połackaj» (mastak Śviatłana Zaskievič).
Manieta taksama atrymała «Pryz hladackich sympatyjaŭ» pa vynikach hałasavańnia ŭ Internecie i ŭziała druhoje miesca ŭ naminacyi «Aryhinalnaja technalohija» (pryz uručany Maskoŭskamu manietnamu dvaru, jaki čakaniŭ manietu).
Na maniecie naminałam u 1 000 biełaruskich rubloŭ adlustravana Spaskaja carkva, zasnavanaja śv. Eŭfrasińniaj Połackaj.
Z advarotnaha boku źmieščana reljefnaja vyjava Kryža Eŭfrasińni Połackaj, pakrytaja zołatam i upryhožanaja roznakalarovymi kamianiami.
U naminacyi «Srebnaja manieta hoda» lepšaj apynułasia «Lehienda pra busła» (mastak Aksana Navasiołava) naminałam u 20 rubloŭ.
Na joj — vobraz narodnaj kultury, kałaŭrot (symbal viečnaha ruchu).
Bližej da krajoŭ maniety, kałaŭrot pastupova pierachodzić u hadavyja koły na zrezach dreva, azdoblenyja biełaruskimi ŭzorami i vyjavami busłoŭ.
Na reviersie maniety — stylizavanaja vyjava busła. Jon uzdymaje kryły, achoplivajučy zory, miesiac u vyhladzie skručanaj źmiejki i žabu — suzorje.
Maniety «Maślenica» i «Biełaruski balet — 2007» zaniali druhoje miesca ŭ naminacyjach «Udałaje mastackaje vyrašeńnie» i «Załataja manieta hoda» adpaviedna.
U «Manietnym Suzorji — 2008» ŭdzielničała 80 manietaŭ z Danii, Hišpanii, Kazachstanu, Polščy, Rasiei, Finlandyi, Armienii, Biełarusi, Bałharyi, Kyrhyzstanu, Łatvii, Litvy, Ukrainy i Lichtenštejnu.
Maniety aceńvalisia mižnarodnym žury, u skład jakoha ŭvachodzili pradstaŭniki muzejaŭ Rasiei, Vialikabrytanii, Aŭstryi, Litvy, Łatvii, admysłoŭcy z Armienii, Biełarusi, Niamieččyny, Italii, Prydniastroŭja i Francyi, a taksama pradstaŭniki kamercyjych bankaŭ.
Uznaharodžańnie pieramožcaŭ konkursu, arhanizavanaha rasiejskim vydaviectvam «Uotier Mark», adbyłosia ŭ Pieciarburhu na pieršaj eŭrapejskaj kanferencyi pa pamiatnych manietach «COINS‑2008».