Žychara Smarhoni prysudzili da pažyćciovaha źniavoleńnia za zabojstva troch čałaviek
Sud Hrodzienskaj vobłaści vynies prysud pa spravie ab trajnym zabojstvie na Smarhonščynie — 35-hadovamu Uładzimiru Tryfanavu pryznačyli pažyćciovaje źniavoleńnie, paviedamlaje BiełaPAN.
Trahiedyja adbyłasia ŭ červieni. Abvinavačany zaśpieŭ žonku z paluboŭnikam i nanios jamu mnostva ŭdaraŭ nažom. Toj skanaŭ na miescy. Paśla hetaha Tryfanaŭ raspraviŭsia z baćkam achviary, jaki pryjšoŭ na dapamohu synu. Treciaj zabitaj stała sužycielka baćki — žančyna znachodziłasia ŭ domie, dzie adbyłosia złačynstva.
Abvinavačany taksama pahražaŭ žoncy zabojstvam, ale joj udałosia ŭciačy da siastry, adkul i vyklikali milicyju.
Usie ŭdzielniki kanfliktu znachodzilisia ŭ stanie ałkaholnaha apjanieńnia. U abvinavačanaha zafiksavali 2,8 pramile ałkaholu ŭ kryvi.
Vinu Tryfanaŭ pryznaŭ častkova. Jon nie admaŭlaŭ, što zabiŭ troch čałaviek, ale śćviardžaŭ, što heta adbyłosia spantanna, a nie było spłanavana zahadzia.
Abvinavačvany maje prava abskardzić prysud.