Žonka Maksima Ryžankova pracuje ŭ vialikaj IT-kampanii
Natalla Ryžankova.
Natalla Ryžankova, žonka novapryznačanaha pieršaha namieśnika kiraŭnika Administracyi prezidenta Maksima Ryžankova pracuje ŭ IT-kampanii.
Farmat kiraŭnictva Administracyi źmianiŭsia 21 śniežnia paśla pryznačeńnia jaje kiraŭnicaj vice-premjerki Natalli Kačanavaj.
Pasadu jaje pieršaha namieśnika, adkaznaha ŭ tym liku za ideałohiju, zaniaŭ Maksim Ryžankoŭ, jaki raniej pracavaŭ vice-prezidentam Nacyjanalnaha alimpijskaha kamiteta.
Cikava, što jahonaja žonka pracuje namieśnicaj dyrektara biełaruskaj IT-kampanii Softeq Flash Solutions.
Maksim i Natalla Ryžankovy.
«Saftek Fleš Salušns» — heta centr raspracoŭki bujnoha karejskaha vytvorcy kampjutarnaj pamiaci SK hynix.
U infarmacyi pra Softeq Flash Solutions na sajcie Dev.by havorycca: «My zajmajemsia raspracoŭkaj i testavańniem ubudavanaha prahramnaha zabieśpiačeńnia dla kantroleraŭ nazapašvalnikaŭ na bazie flash-pamiaci, jakija vykarystoŭvajucca ŭ mabilnych pryładach (eMMC, UFS) i ćvierdacielnych nazapašvalnikach (Solid State Drives, abo SSD-dyskach).
Da niadaŭniaha času Softeq Flash Solutions była vydzielenaj kamandaj raspracoŭnikaŭ kampanii Softeq Development ŭ Minsku. Vykanała dziesiatki zamoŭ pa prajektavańni aparatnych srodkaŭ, raspracoŭcy prašyvak, mižpłatformavaha PA dla rezidentaŭ Kramianiovaj daliny i karparacyj sa śpisu Fortune 500. U 2014 hodzie stała centram raspracoŭki SK hynix i atrymała imia Softeq Flash Solutions.
Siońnia Softeq Flash Solutions - heta kampanija-raspracoŭnica prajektnaha prahramnaha zabieśpiačeńnia dla kampanii-lidara industryi ličbavych pryład zachoŭvańnia dadzienych SK hynix. SK hynix uvachodzić u piaciorku viadučych vytvorcaŭ intehralnych schiem i ŭ trojku vytvorcaŭ apieratyŭnaj pamiaci ŭ śviecie. Jaje paŭpravadnikovaja pamiać typu DRAM i NAND vykarystoŭvajecca ŭ praduktach kampanij Apple, LG, ASUS, Microsoft, Dell dy inšych».