U Maskvie znojdzieny miortvym unuk Stalina
Unuk savieckaha pravadyra Iosifa Stalina Jaŭhien Džuhašvili pamior siońnia na adnoj z vulic Maskvy. Minaki vyklikali chutkuju, ale vyratavać unuka Stalina nie ŭdałosia. Miedyki tolki kanstatavali śmierć.
— Jaŭhien Džuhašvili pamior na paŭnočnym uschodzie Maskvy. Jaho znajšli kala doma na vulicy biesprytomnym, — raspaviała krynica.
Pryčyna śmierci 80-hadovaha piensijaniera budzie vyśvietlenaja paźniej.
Jaŭhien Jakaŭlevič Džuhašvili naradziŭsia 10 studzienia 1936 hoda va Urupinsku. Kandydat histaryčnych navuk, kandydat vajennych navuk, prafiesar. Z 2001 hoda jon uznačalvaŭ Novuju kamunistyčnuju partyju Hruzii. Hramadzianin i Rasii, i Hruzii.
Jaŭhien Džuhašvili ŭ 1990 hodzie vykanaŭ rolu svajho baćki ŭ filmie «Jakaŭ, syn Stalina».
Baćki niabožčyka, Jakaŭ Stalin i Volha Hołyšava, paznajomilisia, kali maci pryjechała ŭ Maskvu z Urupinska pastupać u avijatechnikum. Ale šlub raspaŭsia jašče da viasiella. Hołyšava źjechała va Urupinsk i 10 studzienia 1936 hoda ŭ jaje naradziŭsia syn Jaŭhien. Jakaŭ va Urupinsk nie pryjechaŭ, i chłopčyk spačatku nasiŭ proźvišča Hołyšaŭ, ale praz dva hady Jakaŭ źviarnuŭsia va Urupinski rajkam partyi, i Volzie Hołyšavaj vydali novaje paśviedčańnie ab naradžeńni syna — jon staŭ Jaŭhienam Jakaŭlevičam Džuhašvili.
Adnak dačka Jakava ad druhoj žonki Halina Jakaŭleŭna Džuhašvili asprečvała hetuju viersiju, nie ličačy Jaŭhiena svaim bratam: «U mianie niama padstaŭ ličyć hetaha čałavieka bratam… Mama mnie raskazvała, što adnojčy joj u ruki patrapiŭ list ad niejkaj žančyny z Urupinska. Jana paviedamlała, što naradziła syna i što dzicia hetaje ad taty. Mama bajałasia, što hetaja historyja dojdzie da śviokra, i vyrašyła hetaj žančynie dapamahčy. Jana stała dasyłać joj hrošy na dzicia. Kali baćka vypadkova pra heta daviedaŭsia, jon razzłavaŭsia, kryčaŭ, što nijakaha syna ŭ jaho niama i być nie moža. Imavierna, hetyja paštovyja pieravody ad mamy i byli rascenienyja ZAHSam jak alimienty. Takim čynam Jaŭhien i atrymaŭ naša proźvišča».
Jakaŭ Stalin zahinuŭ padčas vajny ŭ niamieckim pałonie.
Isnuje viersija, što paśla bitvy pad Stalinhradam niamieckaje kamandavańnie chacieła abmianiać Jakava na fieldmaršała Paŭlusa, uziataha Čyrvonaj Armijaj u pałon, i Stalin adkazaŭ na heta: «Ja sałdata na fieldmaršała nie mianiaju!», adnak dakumientalnaha paćviardžeńnia hetamu nie znojdziena.