Narviežski trenier zbornaj Rasii pa bijatłonie pieradavaŭ dadzienyja ŭ WADA
Trenier rasijskaj zbornaj pa bijatłonie, narviežac Knut Tore Bierłand, padčas pracy ŭ Rasii pieradavaŭ infarmacyju ab mahčymych parušeńniach kiraŭniku Suśvietnaha antydopinhavaha ahienctva (WADA) Runie Andersanu, pieradaje VG.no.
Knut Tore Bierłand. Fota HEIKO JUNGE, NTB SCANPIX
Pa słovach Bierłanda, u Rasii jon bačyŭ «mnostva padazronych rečaŭ» i paličyŭ patrebnym dakłaści pra ich kiraŭnictvu WADA. Da prykładu, jon vyjaviŭ, što ŭ trenierskim štabie nacyjanalnaj zbornaj zahadzia viedali pra pryjezd dopinh-aficeraŭ, choć pra ich pryjezd, jak praviła, nie paviedamlajecca zahadzia. Trenier taksama paskardziŭsia, što rasijskija spartsmieny, jakija vyjhrali zołata na Alimpijadzie, zabiaśpiečvajuć sabie budučyniu, u adroźnieńnie ad narviežskich.
«Uziaŭšy zołata na Alimpijskich hulniach u składzie zbornaj Rasii, spartsmien moža zabiaśpiečyć svaju budučyniu. U Narviehii niama takich uznaharod. Rasijskija spartoŭcy mohuć stać achviarami sistemy, narviežskija — nie», — zajaviŭ jon.
Bierłand pieradavaŭ dadzienyja WADA ŭ 2010 hodzie, kali pracavaŭ z rasijskaj zbornaj u jakaści kansultanta.
Jak pisaŭ Ruposters, WADA pieradało Mižnarodnamu sajuzu bijatłanistaŭ (IBU) śpis rasijan, jakija padazrajucca va ŭžyvańni dopinhavych rečyvaŭ. Usiaho ŭ śpisie — 31 rasijski spartoviec. Pastupleńnie dakumienta paćvierdziŭ staršynia IBU Anders Biesebierh.
15 śniežnia dvuchrazovy alimpijski čempijon pa bijatłonie francuz Marten Furkad zaklikaŭ Mižnarodny sajuz bijatłanistaŭ (IBU) pakarać rasijskich spartoŭcaŭ, čyju vinu va ŭžyvańni dopinhu zmohuć dakazać. U inšym vypadku jon paabiacaŭ bajkatavać spabornictvy. Na nastupny dzień stała viadoma, što da bajkotu dałučycca zbornaja Šviecyi.
Inšaj pazicyi prytrymlivajecca vaśmirazovy alimpijski čempijon pa bijatłonie Ule Bjorndalen. Pavodle jaho słoŭ, rasijskija bijatłanisty źjaŭlajucca nievinavatymi va ŭžyvańni dopinhu, pakul nie dakazana advarotnaje.