Uładzimir Niaklajeŭ. Biełaruś — usio, što jość!
Biełarusy! Z hodam Pieŭnia!
Niekamu paščaścić, peŭna,
Naradzicca ŭ hety hod…
Niekamu - naadvarot.
Hetak dadziena daŭno:
Śmierć adna.
Žyćcio adno.
Abdymi - i nie ŭpuści!
Voś jano ŭ travie, liści,
Skraźniakom miž vierbaŭ, łoz -
Mimalotnaje da śloz…
Boža! Ściežku pa žyćci
Daj ty ŭsim prajści nanova,
Kab paśpieli ŭsie dajści
Da najprostaje vysnovy:
Chaj žyćcio nie dadało
Ci rubla, ci čynu,
Ale ŭsio ž
Jano było!..
I mihcieła ŭ im, płyło
Vasilkovaje śviatło
Nieba nad Ajčynaj!
I pad rodnym, kreŭnym niebam
Na ziamli, dzie ty nie hość,
Biełaruś - usio, što treba.
Biełaruś - usio, što jość!