Pieršy, pajšoŭ
Adnym biełaruskim klubam u eŭrakubkach pamienieła. Raźvitaŭsia z Kubka Intertota salihorski «Šachcior».
Jon dajšoŭ da druhoha raŭndu, dzie pa vynikach dvuch matčaŭ ustupiŭ aŭstryjskamu «Šturmu». U pieršym matčy naščadki vajaroŭ Słuckaha zbrojnaha čynu prajhrali ź likam 0:2, a ŭčora, 13 lipienia, u Salihorsku raśpisali ničyju — 0:0.
Zrešty jašče pierad pačatkam dvuboju hałoŭny trenier harniakoŭ Jury Viarhiejčyk nadta skieptyčna hladzieŭ na perspektyvy svajoj kamandy. Takoje ŭražańnie, što «Šachcior» prosta byŝ zaprahramavany na parazu. Tak, učora salihorcy ŭžo na 2‑j chvilinie matču akazalisia ŭ bolšaści, za foł apošniaj nadziei byŭ vydaleny abaronca haściej, ale tak i nia zdoleli zabić hałkiperu aŭstryjcaŭ z prykolnym proźviščam Šyklhruber.
Zusim lahičnaj tamu padajecca reakcyja zaŭziataraŭ na forumach: a navošta tady było zajaŭlacca ŭ Kubak Intertota, sprava ž hetaja dobraachvotnaja.
Trenier haściej Frank Foda, miž inšym, zaznačyŭ, što za 20 hadoŭ karjery nia bačyŭ pola horšaha, čym stadyjon u Salihorsku, paviedamlaje football.by.
U trecim raŭndzie «Šturm» zhulaje z budapešckim «Honvedam».
Na hetym tydni raspačynajucca kvalifikacyjnyja raŭndy Lihi čempijonaŭ i Kubku UEFA. Zaŭtra ŭ baraćbu ŭstupić čempijon Biełarusi i lider sioletniaha pieršynstva barysaŭski BATE. Na haradzkim stadyjonie Barysava jon zhulaje ź iślandzkim «Valuram».
Pačatak matču a 19‑j. Tranślacyja ŭ 18:55 na kanale «Ład».
U čaćvier u 1‑m raŭndzie Kubku UEFA raspačnuć baraćbu MTZ‑RIPA i «Homiel», jakija zhulajuć sa słavackaj «Žylinaj» i varšaŭskaj «Lehijaj».
MTZ‑RIPA pieršy matč pravodzić na mienskim stadyjonie «Traktar». Pačatak a 18‑j.
Matč «Homiela» z «Lehijaj» pačniecca 17 lipienia a 20:45 ŭ Varšavie na stadyjonie Vojska Polskaha. Biełarusy Varšavy majuć unikalnuju mahčymaść, vykazać svoj biełaruski patryjatyzm niepasredna na stadyjonie, a nie pierad manitorami kamputaraŭ i noŭtbukaŭ.